އިނގިރޭސި ޕްރިމިއަރ ލީގުގައި އެވަޓަން އާ ދެކޮޅަށް ކުޅުނު މެޗު 4-0 ގެ ނަތީޖާއަކުން ފަސޭހަކަމާއެކު އެސްޓަން ވިލާއިން ކާމިޔާބުކޮށްފިއެވެ.

އުނާއި އެމެރީގެ އެސްޓަން ވިލާ ވަނީ ސީޒަނުގެ ފުރަތަމަ މެޗުގައި 5-1 ގެ ނަތީޖާއަކުން ނިއުކާސަލް ޔުނައިޓެޑް ކައިރިން ބަލިވެފައެވެ. ނަމަވެސް، އާދިއްތަ ދުވަހު ވިލާ ޕާކްގައި ކުޅުނު މެޗުން އެސްޓަން ވިލާ ވަނީ ބޮޑު މޮޅެއް ހޯދާފައެވެ.

މެޗުގެ 18 ވަނަ މިނެޓުގައި ލިއޯން ބެއިލީ ތަނަވަސްކޮށްދިން ފުރުސަތަކުން ޖޯން މެގިން ވަނީ އެސްޓަން ވިލާއަށް ކުރިހޯދަދީފައެވެ. އެޔަށްފަހު މެޗުގެ 23 ވަނަ މިނެޓުގައި ވޮޓްކިންސްއަށް އެވަޓަންގެ ކީޕަރު ޕިކްފޯޑް ކުރި ފައުލަކާ ގުޅިގެން އެސްޓަން ވިލާއަށް ވަނީ ޕެނެލްޓީއެއް ލިބިފައެވެ. އެ ޕެނެލްޓި ކާމިޔާބުކޮށް، ލީޑު ފުޅާކޮށްދިނީ ޑަގްލަސް ލުއިޒް އެވެ. އެސްޓަން ވިލާއިން ފުރަތަމަ ހާފު ނިންމާލީ ދެ ލަނޑުގެ ލީޑަކާ އެކުއެވެ.

ދެވަނަ ހާފު ފެށިގެން ހަ މިނެޓު ތެރޭގައި ބެއިލީ ވަނީ އެސްޓަން ވިލާގެ ތިންވަނަ ލަނޑު ކާމިޔާބުކޮށްދީފައެވެ. އެ ޓީމުގެ ހަތަރުވަނަ ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޖޯން ޑުރަން އެވެ. އޭނާ ލަނޑު ޖަހާފައިވަނީ ކުޅެން ނިކުތްތާ މިނެޓެއްގެ ތެރޭގައެވެ. މެޗުން ބަލިވުމުގެ އިތުރުން، އެވަޓަންއަށް ހާސްކަން އިތުރުވީ ކެލްވާޓް ލެވިން އާއި އެލެކްސް އިވޯބީއަށް އަނިޔާވެ ބަދަލުކުރަން ޖެހުމުންނެވެ.

މިދިޔަ ސީޒަނުގައި ރެލިގޭޝަނުން ކިރިޔާ ސަލާމަތްވި އެވަޓަންގެ ފެށުން މި ސީޒަނުގައިވެސް ގޯހެވެ. ފުރަތަމަ މެޗުގައި ފުލަމް ކައިރިންވެސް ބަލިވެފައިވާއިރު، އެވަޓަން އޮތީ ތާވަލުގެ ފުލުގައެވެ.