ހުޅުމާލެ ދެވަނަ ފޭސްގެ ފަޅު ތެރޭގައި ހުރި އުޅަނދުތައް ނަގަން އާބަންކޯ އިން އިއުލާންކޮށްފިއެވެ.
އާބަންކޯ އިން އާއްމުކޮށްފައިވާ އިއުލާނުގައި ބުނެފައިވަނީ ހުޅުމާލެ ދެވަނަ ފިޔަވަހީގެ ފަޅުގައި ހިންގުމަށް ހަމަޖެހިފައިވާ ޕޮރޮޖެކްޓަކަށް ފަޅުތެރޭގައި އަޅާފައިވާ އުޅަނދުތަކާއި އަޑިއަށް ގޮސްފައިވާ އުޅަނދުތައް އެސަރަހައްދުން ނެގުމަށް ބޭނުންވާ ކަމަށެވެ.
އެ އުޅަނދުތައް އޮތް ސަރަހައްދުގެ ހިމެނޭ މެޕަކާއެކު ކޮށްފައިވާ އިއުލާނުގައި ބުނެފައިވަނީ އުޅަނދުތަކުގެ ވެރިފަރާތެއްވާނަމަ 10 ދުވަސް ތެރޭގައި އެ ކުންފުނީގެ ހޮޓްލައިން 1516 އަށް ގުޅައި މައުލޫމާތު ސާފާކުރުމަށް ފަހު އުޅަނދުތައް ނެގުމަށް އިލްތިމާސްކުރާ ކަމަށެވެ.
މުއްދަތުގެ ތެރޭގައި އުޅަނދުތައް ނުނަގާނަމަ ކ. ތިލަފުއްޓާއި ކ. ގުޅިފަޅު ފަޅުތެރެއަށް ދޫކޮށްލާފައިވާ އުޅަނދުފަހަރާއި ތަކެއްޗާއި މެދު އަމަލުކުރުމުގެ އުސޫލުގެ ދަށުން އުޅަނދުތަކާއި މެދު އަމަލުކުރެވޭނެ ކަމަށް އާބަންކޯއިން ބުނެއެވެ.
މައުލޫމާތު ލިބިފައިވާ ގޮތުގައި ހުޅުމާލެ އިން ހިއްކަނީ ހުޅުމާލޭގެ ދެ ފޭސް ގުޅުވާލާ ބްރިޖުތައް ހުންނަ ޓަނަލުގެ ހުޅަނގު އުތުރުކޮޅަށް ނިމޭ ހިސާބުން ފެށިގެން އުތުރަށް އޮތް މުޅި ފަޅެވެ.
މި ސަރަހައްދަކީ ހުޅުމާލެ މާސްޓާ ޕްލޭނުގައިވާގޮތުން ނަމަ ކްރޫޒް ލައިނާތަކަށް ހާއްސަ ކޮށްފައިވާ ބަނދަރެކެވެ.
