ޖަރުމަނު ސުޕަ ކަޕްގެ ފައިނަލްގައި އާރްބީ ލައިޕްޒިގާ ވާދަކޮށް ބަޔާން މިއުނިކް ބަލިވި މެޗުގައި، ހެރީ ކޭން ހީރޯއަކަށް ވާނެ ކަމަށް އުންމީދު ނުކުރާ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.

އައު ސީޒަންގެ ފުރަތަމަ މެޗެގައި ލައިޕްޒިގުން ވަނީ ބަޔާނާ ވާދަކޮށް، ސުޕަ ކަޕް ކާމިޔާބުކޮށްފަ އެވެ. އެ މެޗަކީ ޓޮޓެންހަމް ދޫކޮށް ބަޔާނަށް ބަދަލުވި ކޭން އެ ކުލަބަށް ކުޅުނު ފުރަތަމަ މެޗެވެ. މެޗުގައި އޭނާ އަށް ފުރުސަތު ދިނީ ބަދަލު ކުޅުންތެރިޔެއްގެ ގޮތުގަ އެވެ. އެ މެޗަށްފަހު ވާހަކަ ދައްކަމުން ޓުޗެލް ބުނީ، ކޭން ކިބައިން އޭނާ މައާފަށް އެދެން ބޭނުންވާ ކަމަށެވެ. ސަބަބަކީ އެ މެޗުގައި ޓީމެއްގެ ގޮތުގައި ބަޔާނުން ކުޅެން މަސައްކަތް ކުރިއިރު، ކޭން އަށް އެންމެ އެކަށީގެންވާ މިންވަރަށް ފުރުސަތު ތަނަވަަސްކޮށް ނުދެވުން ކަމަށެވެ. އެކަމުގެ ސަބަބެއްގެ ގޮތުގައި ޓުޗެލް ބުނީ، ކޭން ބަޔާއެކު އެކަށީގެންވާ މިންވަރަށް ފަރިތަކުރުންތައް ވެސް ކުރިއަށް ނުގެންދެވުމުން ކަމަށެވެ.

މީގެ އިތުރުން އޭނާ ބުނީ އެ މެޗުގައި ކޭންގެ ފަރާތުން މާ ގިނަ ކަންތައްތަކަށް އުންމީދު ވެސް ނުކުރާ ކަމަށެވެ. އޭނާ ބުނީ އަބަދު ވެސް ޔަގީންވާ ކަމަކީ ކޭން އަކީ މަތީ ފަންތީގެ މޮޅު ކުޅުންތެރިޔެއް ކަމަށާއި، އޭނާގެ ފަރާތުން ބަޔާނަށް ގިނަ ފައިދާތަކެއް ވެސް ވާނެ ކަމަށެވެ. ޓުޗެލް ބުނީ ކުރިއަށް އޮތް ދުވަސްތަކުގައި ކޭން ދާނީ ޓީމާއެކު ފަރިތަކުރުންތަކުގައި ބައިވެރިވަމުން ކަމަށާއި، އެހެންކަމުން މަޑުމަޑުން އޭނާ އަންނާނީ ބަޔާންގެ ވައްޓަފާޅި އަށް ހޭނެމުން ކަމަށެވެ. އޭނާ ފާހަގަ ކުރި ގޮތުގައި ކޭން އޭނާގެ ކުރީގެ ކުލަބު ޓޮޓެންހަމް އަދި އިންގްލެންޑުގެ ޤައުމީ ޓީމުގައި ވެސް ދައްކާފައި ވަނީ އާދަޔާ ޚިލާފު މޮޅު ކުޅުމެކެވެ.

ބަޔާނަށް ދެން އޮންނާނީ އޯގަސްޓު މަހުގެ 18 ވަނަ ދުވަހު ޖަރުމަނު ލީގުގައި ވާޑާއާ ދެކޮޅަށް ކުޅޭ މެޗެވެ.