ހުއްދަނެތި ވޯޓުކަރުދާސް އުފެއްދުން، ނުވަތަ ވޯޓުކަރުދާހުގެ ގޮތުގައި އިންތިޚާބުގައި ބޭނުންކުރެވިދާނެ އެއާ އެއްފަދަ އެއްޗެއް އުފެެއްދުމަކީ މަނާކަމެއް ކަމަށް، އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވެއްޖެއެވެ.

ހަބީބު ވިދާޅުވީ ހުއްދަނެތި ވޯޓުކަރުދާސް އުފެއްދުން ނުވަތަ ވޯޓުކަރުދާހުގެ ގޮތުގައި އިންތިޚާބުގައި ބޭނުންކުރެވިދާނެ އެއާ އެއްފަދަ އެއްޗެއް އުފެއްދުމަކީ، އިންތިޚާބުތަކާބެހޭ އާންމު ގާނޫނުގައި މަނާކަމެއްކަމަށެވެ. އެހެންކަމުން ސޯޝަލް މީޑިއާގައި ނުވަތަ މީޑިއާގައި ކެންޑިޑޭޓުންގެ މައުލޫމާތު ހިއްސާކުރާނަމަ މިކަމަށް ސަމާލުވުމަށް ހަބީބު ވަނީ އެދިވަޑައިގެންފައެވެ. ހަބީބު މިކަން ހަނދާންކޮށްދެއްވާފައި މިވަނީ، ބައެއް ފަރާތްތަކުން، ވޯޓު ކަރުދާސް ހުންނަ ގޮތަށް ކެންޑިޑޭޓުންގެ ކެމްޕޭން ޕޯސްޓުތައް ސޯޝަލް މީޑިއާގައި ޝެއަރކޮށްފައި ވަނިކޮށެވެ. ހަބީބު ވަނީ ކެންޑިޑޭޓުންގެ މައުލޫމާތު ހިއްސާކުރާނަމަ، މިކަމަށް ސަމާލުވުމަށް އިލްތިމާސް ކުރައްވާފައެވެ.

ރިޔާސީ އިންތިޚާބުގައި 8 ކެންޑިޑޭޓުން ވާދަކުރައްވައެވެ. އެއީ އަމިއްލަ ގޮތުން ވާދަކުރައްވާ އުމަރު ނަސީރާއި، ހަސަން ޒަމީލާއި، ފާރިސް މައުމޫނާއި، އަދި އެމްޑީޕީގެ ފަރާތުން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި، ޕީއެންސީގެ ފަރާތުން ޑރ. މުހައްމަދު މުއިއްޒާއި، ޖުމްހޫރީ ޕާޓީ ފަރާތުން ގާސިމް އިބްރާހީމާއި، ދަ ޑިމޮކްރެޓްސްއިން އިލްޔާސް ލަބީބާއި އަދި އެމްއެންޕީގެ ކެންޑިޑޭޓް ކާނަލް މުހައްމަދު ނާޒިމެވެ.