އުފަންދުވަސް ފާހަގަ ކުރުމަށް ބޮލީވުޑް އަދި ހޮލީވުޑްގެ ތަރި ޕްރިޔަންކާ ޗޮޕްޅާ މާލެ އައިސްފިއެވެ.
ޕްރިޔަންކާ ރާއްޖެ އައިސްފައިވާކަން އޭނާ ރަސްމީ ސިފައެއްގައި އިއުލާނު ނުކުރި ނަމަވެސް އޭނާގެ އިންސްޓަގްރާމް ސްޓޯރީއަށް ލާފައިވާ ވީޑިއޯތަކުން އެއީ ރާއްޖެ ކަން ޔަގީންވެއެވެ.
ޕްރިޔަންކާގެ އިންސްޓަގްރާމުން އެނގޭ ގޮތުގައި އޭނާ ރާއްޖެ އައިސްފައި ވަނީ އާދީއްތަ ދުވަހުއެވެ.
އޭނާ އިންސްޓަގްރާމަށް ލާފައިވާ ޕާސްޕޯޓު ފޮޓޯއެއްގެ ކެޕްޝަނުގައި ޖަހާފައިވަނީ 3 މީހުންގެ ޕާސްޕޯޓު ކަމަށާއި އޭނާގެ އުފަންދުވަހުގެ އިހުސާސް ކުރުވާ ކަމަށެވެ. އަދި އޭގައި އޭނާ ވަނީ އޭނާގެ މަންމަ މަދޫ ޗޯޕްޅާ އާއި ކޮއްކޮ ސިދާރްތު ޗޯޕްޅާ ޓެގް ވެސް ކޮށްފައެވެ.
އޭނާ އިންސްޓަގްރާމް ސްޓޯރީއަށް ލާފައިވާ އެހެން ވީޑިއޯއެއްގައި ލިޔެފައި ވަނީ ސީޕްލޭން ދަތުރަކީ އޭނާ ވަރަށް ގަޔާވާ ދަތުރެއް ކަމަށެވެ.
ޕްރިޔަންކާ ރާއްޖޭގައި އުފަންދުވަސް ފާހަގަ ކުރަނީ ކޮން ރިސޯޓެއްކަމެއް އަދި ކިހާދުވަހަކަށް ކަމެއް ސާފުވާ ގޮތެއް ނުވެއެވެ. ޕްރިޔަންކާގެ އުފަންދުވަހަކީ ޖުލައި 18 އެވެ.
