ވާދަވެރިންނަށް ދެއްވާނެ ނަސޭހަތްޕުޅަކީ، އެމްޑީޕީއާ ގުޅިފައިވާ ޕާޓީތަކުގެ ކެމްޕެއިނަށް ހުރަސްނާޅައި، ކެނޑިޑޭޓެއް ދެއްކުންކަަމަށް، އެމްޑީޕީގެ ޗެއަރޕަރސަން އަދި އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.
އޭނާ އެފަދައިން ވިދާޅުވީ ފުވައްމުލައް ސިޓީގައި ބޭއްވި އުފާވެރި އަމާން ރާއްޖެ ކެމްޕެއިން ޖަލްސާގައި ވާހަކަފުޅުދައްކަވަމުންނެވެ.
އިދިކޮޅު ފަރާތްތަކުން ރައީސް އިބްރާހީމް މުހައްމަދު ސާލިހުގެ ކެމްޕެއިނަށް ހުރަސް އަޅަން މަސައްކަތްކުރާކަން ފާހަގަކުރައްވައި ފައްޔާޒް ވިދާޅުވީ، އެފަދަ ކަންކަން ކުރަމުން ދަނީ ރައީސް ސާލިހާ ވާދަކުރެވޭނެ ވަރުގެ ކެނޑިޑޭޓެއް ނެތުމުން ކަމަށެވެ. އަދި ރައީސުލްޖުމްހޫރިއްޔާއަކީ ހިތްޕުޅުތިރި ބޭފުޅެއް ކަމަށް ވީނަމަވެސް، އެމަނިކުފާނަކީ ހިތްޕުޅުތިރި ބޭފުޅެއް ނޫންކަމަށް ފައްޔާޒް ވަނީ ވިދާޅުވެފައެވެ. ފައްޔާޒް ވިދާޅުވީ ކެމްޕެއިނަށް ހުރަސްއަޅާނަމަ އިދިކޮޅު ފަރާތްތަކަށް އެއްވެސް ރަށެއްގައި ކެމްޕެއިން ނުކުރެވޭނެ ކަމަށެވެ.
ފައްޔާޒް ވަކި ޕާޓީއެއްގެ ނަން ވިދާޅުވެފައި ނުވިނަމަވެސް އެ ވާހަކަތައް އަމާޒުކުރެއްވީ އިދިކޮޅު ޕީޕީއެމަށް ކަމަށް ބެލެވެއެވެ. ޕީޕީއެމުން ދަނީ ރައީސް ސާލިހުގެ ކެމްޕެއިން ދަތުރުތައް އޮންނަ ރަށްރަށުގައި، އެ މަނިކުފާނަށް ތާއީދުކުރާ ފަރާތްތަކުން ހިންގާ ސިޔާސީ ހަރަކާތްތައް އޮންނަ ސަރަހައްދުތަކަށް އެއްވެ, އެ ހަރަކާތްތަކަށް ހުރަސްއަޅައި އަޑުގަދަކުރުމަށް މަސައްކަތް ކުރަމުންނެވެ. ފައްޔާޒް ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އޭރު އެމްޑީޕީން ކެމްޕެއިންނަށް ނުކުތީ ރައްކާތެރި މާހައުލެއްގައި ނޫން ކަމަށް ވިދާޅުވެފައެވެ. އޭރު ކެމްޕެއިންނަށް ނުކުންނައިރު ދެން ވާނެ ގޮތެއް ނޭނގި ބިރުވެރިކަމެއްގައި ތިބެން ޖެހުނު ކަމަށް ފައްޔާޒް ވިދާޅުވިއެވެ. ނަމަވެސް މިއަދު އިދިކޮޅު ފަރާތްތަކަށް ވެސް ކެމްޕެއިން ކުރުމަށް ފުރުސަތު އޮތްކަމަށް ފައްޔާޒް ވިދާޅުވިއެވެ. ފައްޔާޒް ވަނީ އެމްޑީޕީގެ އަޒުމް ނުގުޑާނެކަމަށާއި އެ ޕާޓީ ރޫޅައިނުލެވޭނެ ކަމަށްވެސް ވިދާޅުވެފައެވެ.
