އައު ސީޒަނަށް ތައްޔާރުވުމުގެ ގޮތުން ކުޅުނު ރަޙުމަތްތެރިކަމުގެ މެޗުގައި ބާސެލޯނާ އިން ވާދަވެރި ރެއާލް މެޑްރިޑު ބަލިކޮށްފި އެވެ.

ބާސެލޯނާ އިން ރެއާލްގެ މައްޗަށް ކުރި ހޯދީ 3-0 އިންނެވެ. މެޗުގައި ދެ ޓީމުން ވެސް ވަނީ މުހިންމު ކުޅުންތެރިންނަށް ފުރަތަމަ 11 އިން ފުރުސަތު ދީފަ އެވެ. މެޗުގައި ބާސެލޯނާ އިން ފުރަތަމަ ލަނޑު ޖަހައި ލީޑު ނެގީ 15 ވަނަ މިނެޓުގަ އެވެ. އެއީ ފްރާންސްގެ އޮސްމާން ޑެމްބެލޭ ޖަހައިދިން ލަނޑުންނެވެ. އޭގެ ފަހުން ވެސް ބާސެލޯނާ އިން ވަނީ އިތުރު ލަނޑު ޖެހުމަށް ހަމަލާތަކެއް އުފައްދައިފަ އެވެ. ބާސެލޯނާގެ އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ. މެެޗުގެ 85 ވަނަ މިނެޓުގައި ބާސެލޯނާގެ ދެ ވަނަ ލަނޑު ޖެހީ ފާމިން ލޮޕޭޒް މާޓިން އެވެ. ފަހު ލަނޑު މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ސްޕެއިންގެ ފެރާން ޓޮރޭސް އެވެ.

މިއީ އައު ސީޒަނަށް ތައްޔާރުވުމަށް ބާސެލޯނާ އިން ކުޅުނު ތިން ވަނަ މެޗެވެ. އޭގެ ތެރެއިން އާސެނަލާ ދެކޮޅަށް ކުޅުނު މެޗުން އެ ޓީމު ވަނީ ބަލިވެފަ އެވެ. ސީޒަން ފެށުމުގެ ކުރިން ދެން ބާސެލޯނާ ނިކުންނާނީ އޭސީ މިލާނާ ދެކޮޅަށެވެ. ރެއާލުން މިހާތަނަށް ތިން މެޗު ކުޅުނުއިރު، ބަލިވީ ހަމައެކަނި ބާސެލޯނާ އަތުންނެވެ. ސީޒަން ފެށުމުގެ ކުރިން ރެއާލް ނިކުންނާނީ ޔުވެންޓަސްއާ ދެކޮޅަށެވެ.