މި ނިމުނު އީދުގައި ދިއްގަރު ޒުވާނުންގެ ޖަމްއިއްޔާއާއެކު ތ. ދިޔަމިގިލީގައި ދިން ޝޯވއަކީ އޭނާގެ 100 ވަނަ ޝޯވއެވެ. އެޖަމްއިއްޔާގެވެސް 100 ވަނަ ލަނގިރި ޝޯވއެވެ. 100 ޝޯވ ހަމަކުރިއިރު އެޓީމްގެ އެންމެ އިސް ލީޑަރަކީ މުހައްމަދު ހުސައިން (ބުލޫ)އެވެ. އޭނާއަކީ އެޓީމުގެ އެންމެ އިސް އެއް ބެރުވެރިޔާއެވެ.
މިހާރު ސާޅީހުން މަތީގެ އުމުރުތައް ގުނަމުންދާ މުހައްމަދު ހުސައިން ބެރުޖަހަން ފެށީ ސްކޫލްގައި ކިޔަވަން އުޅުނު ދުވަސްވަރު ލިބުނު ފުރުސަތެއްގައެވެ. އެއީ މިނިވަން ދުވަހަކަށް ސްކޫލުން ތައްޔާރުކުރި އައިޓަމަކަށް ބެރުޖަހާނެ ކުދިން ހޯދަން އުޅުމުގެ ތެރެއިން ލިބުނު ފުރުސަތެވެ. އެހާހިސާބުން ބެރުޖެހުމަށް އޭނާގެ ހިތުގައި އުފެދުނީ މާވަރުގަދަ ޝައުގުވެރިކަމެކެވެ. ޖަމްއިއްޔާ ގެއަށް ގޮސް ބޮޑެތި މީހުން ބެރުޖަހާތަން ބަލަންވެސް އިނދެއެވެ. ނަތީޖާއަކީ މަޑުމަޑުން ފުރުސަތު ލިބި، ހުނަރުވެރިއަކަށް ވުމެވެ.
ދަސްވި ހިސާބުން، ކުޑައިރުވެސް ޖަމްއިއްޔާ މީހުންނާއެކު ނުގެންދާއިރުވެސް އަޅުގަނޑު އިންނަން ބެރުޖަހާ ތަނަސް ގޮސް. އެމީހުން އިންޓަރވަލްއަށް ދާ ގަޑީގަ ބެރުގަ ޖަހާލަން, އެމީހުން ކިޔާ ލަވަ ކިޔާލަން. އަޅުގަނޑުމެން ގޭތެރޭގަ ގެންގުޅޭ މި ލަވަތަކާ އެއްޗިހި އޭރުވެސް. އެހެންވެގެން އެއަށް ވަރަށް ފަރިތަ. އެކީގަ އުޅޭ ރައްޓެހިންވެސް، ބައްޕަމެންވެސް، ބޭބެމެންގެ ތެރޭގަވެސް އަބަދުވެސް މިކަންތައް އޮވޭ.މުހައްމަދު ހުސައިން/ ބެރުވެރިއެއް
މުހައްމަދު ހުސައިންގެ ވަށައިގެން އޮތީ ސަގާފީ ކުޅިވަރެވެ. ބެރެވެ. އޭނާގެ ރަށް ކަމަށްވާ ދިއްގަރަކީ ލަނގިރީގައި އެއްވަނައެވެ. ރަށުގެ ދެ ޖަމްއިއްޔާގެ ތެރެއިން އޭނާ ނިސްބަތްވަނީ ދިއްގަރު ޒުވާނުންގެ ޖަމްއިއްޔާއަށެވެ. އެއީ ދިއްގަރު މަސްވެރިންގެ ރޫހުގެ ނަން 1993 ވަނަ އަހަރު ދިއްގަރު ޒުވާނުންގެ ޖަމްއިއްޔާއަށް ބަދަލުކޮށް ހިންގަމުން އަންނަ ޖަމްއިއްޔާއެވެ. އެޖަމްއިއްޔާގެ ރައީސްކަންވެސް އޭނާ ކޮށްފިއެވެ.
ބެރުޖަހަން ފަށައިގެން އެކަމަށް ބޮޑު ޝައުގެއް އުފެދުނުއިރުވެސް ހިތަށް ގެނެވިފައި ނުވަނީ ޓީމުގެ އެންމެ އިސް މީހެއްގެ ގޮތުގައި ހުންނާނެކަމެވެ. 100 ވަނަ ޝޯވ ލީޑްކުރަން ހުންނާނީ އޭނާކަމެވެ. އެކަން މުހައްމަދު ހުސައިން ދެކެނީ ބޮޑު ޝަރަފެއްގެ ގޮތުގައެވެ.
މީ އާދައިގެ ކަމެއް ނޫން, ކުޑަކަމެއް ނޫން, 100 ޝޯވ ހަމަކުރުމަކީ. މީ ވަރަށް މަސައްކަތް. ވަރަށްގިނަ ބައެއްގެ މަސައްކަތް.މުހައްމަދު ހުސައިން/ ބެރުވެރިއެއް
މުހައްމަދު ހުސައިން ހުރީ ސަގާފީ ކުޅިވަރުގެ ތެރެއަށް ގޮސް ހުސްވެފައެއެވެ. ގޯސްކޮށް ކިރިޔާ ކަމެއް ދާހެން ހީވާނަމަވެސް އޭނާގެ މޫޑް ގޯސްވެއެވެ. އޭނާއަކީ ހަމައެކަނި ބެރު ޖަހާ މީހެއް ނޫނެވެ. އޭނާއަކީ ކޯޗެކެވެ. ބެރު ޖެހުމުގައި އުސްތާޒެކެވެ. ރަށުގެ ޒުވާނުންނަށް (ވަކިން ޚާއްސަކޮށް) އޭނާ ނިސްބަތްވާ ޖަމްއިއްޔާގެ ޒުވާނުންނަށް ބެރުޖަހަން ދަސްކޮށްދިނުމަށް ބޮޑު އިސްކަމެއް ދެއެވެ. އެއީވެސް ޝައުގާ ގުޅިފައިވާ ކަމެކެވެ. އެކަމުން ލިބޭ ހިތްހަމަޖެހުންވެސް ބޮޑެވެ.
އެކުދިން އެކަން ބަލައިގަތުމަކީ ވަރަށް ބޮޑު ހިތްހަމަޖެހުމެއް. ބެރުގެ ކަމަކާ އަޅުގަނޑު ފާޑެއް ކިޔައިފިއްޔާ އެގޮތަކަށް އެކުދިން މަސައްކަތްކުރޭ. އަޅުގަނޑުމެންގެ ލަނގިރީގެ ބެރަކީ ވަރަށް ފުރިހަމައަށް، ރޭވުންތެރިކަމާއެކު ޖަހާ ބެރެއް. އެއީ ވަރަށްބޮޑު ކާމިޔާބީއެއް.މުހައްމަދު ހުސައިން/ ބެރުވެރިއެއް
މުހައްމަދު ހުސައިން ލަނގިރި ޓީމާއެކު އެޖަހާ ތަފާތު ބެރު ވަރަށް ގިނަ ރަށްރަށުގެ މީހުންނަށް މިހާރުވެސް ފެނިއްޖެއެވެ. މިނިމުނު އީދުގައި އެކަނިވެސް 4 ރަށެއްގެ ރައްޔިތުންނަށް އެހުނަރު ދައްކައިފިއެވެ.
ބެރު ޖެހުމުގެ އިތުރުން އޭނާ ހިސާބަކަށް ލަވަވެސް ހަދައެވެ. އެއީވެސް ސްކޫލް ދައުރުގައި އުފެދުނު ޝައުގެއްގެ ތެރެއިން ކުރަމުން އަންނަ ކަމެކެވެ. ސަގާފީ ކުޅިވަރުގައި (ޚާއްސަކޮށް ލަނގިރީގައި) ދިއްގަރަކީ އެއްވަނައެވެ. މުހައްމަދު ހުސައިނަކީ ދިއްގަރުން މިހާރު ހޮވާލެވޭ، އެލިސްޓްގެ ކުރީގައި އޮތް ހުނަރުވެރިއެކެވެ. ބުލޫގެ ނަމަކީ މިފަންނުގައި ބަސްވިކޭ މަގުބޫލް ނަމެކެވެ.