ދަޢުލަތުން 163 ކުދިން ބަލަހައްޓަމުން ގެންދާ ކަމަށް މިނިސްޓްރީ އޮފް ޖެންޑަރ އެންޑް ފެމެލީގެ މިނިސްޓަރ އައިމިނަތު ޒެނީޝާ ޝަހީދު ޒަކީ ވިދާޅުވެއްޖެއެވެ.

މިނިސްޓްރީ އޮފް ޖެންޑަރ އެންޑް ފެމެލީން ކުޑަކުދިންގެ ހިޔާގައި ބަލަހައްޓަމުންގެންދާ ކުދިންނަކީ މުޖުތަމަޢުގައި ކާމިޔާބު ބަޔަކަށް ހެދުމަށް މީޑިއާއިން ކޮށްދެވޭނެ ކަންތައްތަކަށް އަލިއަޅުވާލުމުގެ ގޮތުން ބުރާސްފަތި ދުވަހު ބޭއްވި ޕްރެސް ކޮންފަރަންސްގައި މިނިސްޓަރ ޒެނީޝާ ވިދާޅުވީ  ދަޢުލަތުގެ ބެލުމުގެ ދަށަށް ނަގާފައިވާ ކުދިން ބަލަހައްޓަމުން ގެންދަނީ ތިން މަރުކަޒެއްގައި ކަމަށާއި އެއީ ވިލިމާލޭގައި ހުންނަ ކުޑަކުދިންގެ ހިޔާ އާއި އަމާން ހިޔާ އަދި ހުޅުމާލޭގައި ހުންނަ ފިޔަވަތި ކަމަށެވެ.

"މިކުދިންނަކީ އާއިލާގެ ފަރާތުން އެކި ކަހަލަ އަނިޔާއާ އިހުމާލު ތަހައްމަލުކުރަންޖެހިފައި، އެކުދިންގެ އާއިލާގެ ފަރާތުން ބޭނުންވާ ރައްކާތެރިކަން ނުލިބުމުގެ ސަބަބުން އެ ރައްކާތެރިކަން ފޯރުކޮށްދިނުމަށްޓަކައި ސަރުކާރުގެ ބެލުމުގެ ދަށުން ބަލަހައްޓާ ކުދިން. އެއްވެސް ހާލެއްގައި އެކުދިންނަށް ދިމާވެފައިވާ ކަންތައްތަކަކީ އެކުދިންގެ ކުށެއް ނޫން. މިގޮތުން ވިހާފައި ތުއްތު ކުއްޖާ ދޫކޮށްލާފަ ދާއިރު، އެކުއްޖާގެ މަންމަ މާބަނޑުއިރު މަސްތުވާތަކެތި ބޭނުންކޮށްފައިވާތީ ވިހާއިރުވެސް އެކުއްޖާގެ ހަށިގަނޑުގައި އޭގެ އަސަރު ފެންނަން ހުރޭ. ޑްރަގް ވިތުޑްރޯވަލް ސިމްޕްޓަމްސް އައުމާއި އޭގެ އިތުރުން ވަރަށް ގިނަ ބޭސްތަކަށް އެކުދިންގެ ހަށިގަނޑު ރެސިސްޓަންޓްވުމުގެ ސަބަބުން ވަރަށް ގިނަ ދުވަސްތައް ހޮސްޕިޓަލްގައި ހޭދަކުރަންޖެހޭ ތުއްތު ކުދިން ހިމެނޭ،" މިނިސްޓަރ ޒެނީޝާ ވިދާޅުވިއެވެ.

 މިނިސްޓަރ ޒެނީޝާ ވިދާޅުވީ ޖިސްމާނީ އަނިޔާގެ މައްސަލަތަކުގައި ނަގާ ކުދިންތަކުގެ ތެރޭގައި ތަންތަނުގައި އައްސައި އަނިޔާކުރުމުގެ ސަބަބުން ގައިން ލޭ އައިސް ނޫފައިގަނެފައި ހުންނަ ކުދިން ހިމެނޭ ކަމަށާއި ތުއްތު އިރުއްސުރެ އާއިލާގެ ޖިންސީ އަނިޔާގެ ޝިކާރައަކަށްވެފައިވާ ކުދިން ހިމެނޭ ކަމަށެވެ. އަދި މައިންބަފައިން ކުދިންގެ ކުރިމަތީގައި މާރާމާރި ހިންގައި އެވާހަކަތައް ކުދިން ހިއްސާކޮށްފި ނަމަ އެކުދިންނަށް ގެއްލުންދޭނެ ކަމަށް ބުނެ މައިންބަފައިން ބިރުދައްކާފައިވާ ކުދިން ވެސް ހިމެނޭ ކަމަށެވެ.  

"ދިވެހިރާއްޖެ ފަދަ ކުޑަ އާބާދީއަކަށް ނިސްބަތަވާ ޤައުމެއްގައި މައިންބަފައިންނާއި އާއިލާގެ ލޯބިން މަހްރޫމްވެފައިވާ މިހާ ގިނަ އަދަދެއްގެ ކުޑަކުދިން ތިބުމަކީ އަޅުގަނޑުމެން އެންމެން ވެސް ހިތާމަކުރަންޖެހޭ ކަމެއް. މިކަހަލަ އަނިޔާތައް ތަހައްމަލުކޮށްފައިވާ 163 ކުދިންގެ މަންމަ އާއި ބައްޕަގެ ޒިންމާ އަޅުގަނޑުމެން މިނަގަނީ. މީގެ 9 އަހަރުކުރިން އަޅުގަނޑު ކުޑަކުދިންގެ ހިޔާއަށް ފުރަތަމަ ޒިޔާރަތްކުރި ދުވަހުން ފެށިގެން ވެސް މިކުދިންނަކީ މާޒީގައި އަޅުގަނޑުމެންނަށް އިހުސާސްކުރަން އުނދަގޫ، ވަރަށް ހިތާމަވެރި ކަންތައްތަކެއް ތަހައްމަލުކުރަންޖެހިފައިވާ ކުދިންކަމުގައި ވީނަމަވެސް މިކުދިންނަކީ ވަރަށް އާދަޔާ ހިލާފަށް ހިތްވަރުގަދަ ކުދިންކަން އެނގުނު،" މިނިސްޓަރ ޒެނީޝާ ވިދާޅުވިއެވެ.

މީގެ އިތުރުން މިނިސްޓަރ ޒެނީޝާ ވިދާޅުވީ މިކަހަލަ ކުދިންނަށް އެހީތެރިވުމުގެ ގޮތުން ދަޢުލަތުގެ އެކި މުއައްސަސާތަކާއި ކުންފުނިތަކާއި ޖަމިއްޔާ ޖަމާއައްތަކުންނާއި އަމިއްލަ ފަރުދުންދެއްވާ އެއްބާރުލުން އުފަލާ އެކީ ފާހަގަކުރާ ކަމަށާއި މުސްތަޤްބަލުގައި ވެސް މިއަށްވުރެ ބޮޑަށް އެއްބާރުލުން ހުރިހާ ފަރާތްތަކުން ވެސް ދެއްވާނެ ކަމަށް އުންމީދުކުރައްވާ ކަމަށެވެ.

ޕްރެސް ކޮންފަރަންސް ނިންމާލަމުން މިނިސްޓަރ ޒެނީޝާ ވިދާޅުވީ މިކުދިންނަށް ހެޔޮ ބަދަލުތަކެއް ގެނައުމަށްޓަކައި އެންމެ ބޮޑު ރޯލެއް އަދާކުރި އެއް ފަރާތަކީ މީޑިއާތައް ކަމަށާއި މިނިސްޓްރީގެ އުންމީދަކީ ދަޢުލަތުގެ ބެލުމުގެ ދަށުގައިވާ ކޮންމެ ކުއްޖަކީ ވެސް ބާރުވެރި، ހޭލުންތެރި، މުޖުތަމަޢުއިން ބަލައިގަންނާނެ ނަމޫނާ ކުދިންތަކަށް ވެގެންދިޔުން ކަމަށވެެ. އަދި އެކި ބާވަތުގެ އަނިޔާ އާއި އާއިލާގެ އިހުމާލުގެ ސަބަބުން ލޯބިން މަހްރޫމްވެފައިވާ ކުދިންގެ އަދަދު މުސްތަޤްބަލުގައި މަދުވެގެންދިޔުން ކަމަށެވެ. އަދި އެންމެން ގުޅިގެން މިކަހަލަ ކުދިންނަށް ދިމާވާ އަނިޔާތައް ހުއްޓުވަން މަސައްކަތްކުރާ މުޖުތަމަޢުއެއް ދިވެހިރާއްޖޭގައި ބިނާވެގެންދާނެ ކަމަށް އުންމީދުކުރައްވާ ކަމަށް މިނިސްޓަރު ވިދާޅުވިއެވެ.