ކުރިއަށް އޮތް ސީޒަންގައި ޗެމްޕިއަން މެންޗެސްޓަރ ސިޓީގެ ޕްރިމިއަރ ލީގު ފެށުން ޝައުގުވެރި މެޗަކަށް ވެއްޖެއެވެ.

ސިޓީން އާ ސީޒަނުގައި ލީގުގެ ފުރަތަމަ މެޗުގައި ވާދަކުރާނީ، އެ ޓީމުގެ ކުރީގެ ކެޕްޓަން ކޮމްޕެނީ ކޯޗުކޮށްދޭ ބާންލީއާއެވެ. ކުރިއަށް އޮތް ސީޒަނަށް ޕްރޮމޯޓްވި ބާންލީއާ ދެކޮޅަށް ސިޓީ ނިކުންނާނީ އޮގަސްޓް މަހުގެ 11 ވަނަ ދުވަހުއެވެ. ބާންލީ ކުރިއަށް އޮތް ސީޒަނަށް ޕްރޮމޯޓް ކޮށްދިނީވެސް ސިޓީގެ ކާމިޔާބު ކެޕްޓަން، ކޮމްޕެނީއެވެ. ބެލްޖިއަމާއި ސިޓީގެ ކުރީގެ ވަރުގަދަ ޑިފެންޑަރަކީ ސިޓީގެ ލެޖެންޑެކެވެ. ސިޓީގެ މިހާރުގެ ކޯޗު ޕެޕް ގާޑިއޯލާ ގަބޫލުކުރާގޮތުގައި ކުރިއަށް އޮތްތަނުގައި ސިޓީގެ ކޯޗުކަމުންވެސް ކޮމްޕެނީ ފެންނާނެއެވެ. ސިޓީގައި ހޭދަކުރި 11 އަހަރުގެ ތެރޭގައި ކޮމްޕެނީ ވަނީ 4 ފަހަރު ލީގު ހޯދާފައެވެ. އެހެންކަމުން މިމެޗު ވެގެންދާނީ ޝައުގުވެރި މެޗަކަށެވެ.

ޕޮޗެޓީނޯއާއެކު ޗެލްސީ ލީގުގައި ކުޅޭ ފުރަތަމަ މެޗުގައި ވާދަކުރަންޖެހޭނީ ލިވަޕޫލާއެވެ. އެއީ އޮގަސްޓް 13 ވަނަ ދުވަހުއެވެ. އާ ކޯޗާއެކު ޓޮޓެންހަމްއަށް ލީގުގެ ފުރަތަމަ މެޗުގައި ވާދަކުރަން ޖެހޭނީ ބްރެންޓްފޯޑާއެވެ. މެންޗެސްޓަރ ޔުނައިޓެޑްގެ ފެށުން އޮތީ ވުލްވްސްއާ ދެކޮޅަށެވެ.