ވެސްޓް ހޭމް ޔުނައިޓެޑަށް ކުޅެމުން އަންނަ އިންގްލެންޑުގެ ޑިފެންސިވް މިޑްފީލްޑަރު ޑެކްލަން ރައިސް ހޯދުމަށް ބަޔާން މިއުނިކުން ބޭނުންވި ނަމަވެސް، އެ ކުލަބަށް ކުރިއެރުންތަކެއް ހޯދިފައި ނުވާ ކަމަށް މީޑިއާ ރިޕޯޓުތައް ބުނެފި އެވެ.

މި ސީޒަނަށް ފަހު ރައިސް އެ ކުލަބު ދޫކޮށްލާނެ ކަމަށް ވަނީ ވަރަށް ބޮޑަށް ބެލެވިފަ އެވެ، އެކަމާ ގުޅޭ ވާހަކަ ވެސްޓް ހޭމްގެ ރައީސް ވެސް ވަނީ ދައްކަވައިފަ އެވެ. މި ސީޒަނުގައި ވެސްޓް ހޭމްގައި ތަފާތު މޮޅު ކުޅުމެއް ދެއްކި ރައިސް ހޯދުމަށް ޔޫރަޕުގެ ގިނަ ކުލަބުތަކުން ޝައުޤުވެރިވާއިރު، ބަޔާންގެ އިތުރުން އެ ލިސްޓުގައި އާސެނަލް ވެސް ހިމެނެ އެވެ. ރައިސް އަކީ ބަޔާންގެ އައު ކޯޗު ތޯމަސް ޓުޗެލް ވަރަށް ގަޔާވާ ކުޅުންތެރިޔެކެވެ. އެހެންކަމުން އޭނާ ހޯދުމުގެ މަސައްކަތް ބަޔާނުން ކުރި ނަމަވެސް، އެކަމުގައި އެ ކުލަބަށް އެއްވެސް ކުރިއެރުންތަކެއް ލިބިފައި ނުވާ ކަމަށް ވެސް މީޑިއާ ތަކުން ބުނެ އެވެ. ސަބަބަކީ ރައިސް ބޭނުންވަނީ ޕްރިމިއާ ލީގުގެ ކުލަބަކަށް ކުޅެން ކަމަށްވުމުންނެވެ.

އިނގިރޭސި މީޑިއާތަކުގައި ބުނެފައިވާ ގޮތުން ރައިސް ހޯދުމުގެ ރޭހުގައި މިވަގުތު ކުރި ހޯދަނީ އާސެނަލް އެވެ. މިހާރު އެ ކުލަބުން ތައްޔާރުވަމުން އަންނަނީ ރައިސް އަށް ރަސްމީކޮށް ބިޑު ހުށަހަޅަން ކަމަށާއި، ކުރިއަށް އޮތް ދުވަސްތަކުގައި އެކަން ކުރާނެ ކަމަށް ވަނީ ބުނެފަ އެވެ. ރައިސް ހޯދުމަށް ކުރަމުން އަންނަ މަޝްވަރާތަކުގައި އާސެނަލަށް އަލި މަގެއް ފެނިފައިވާ ކަމަށާއި، ނަމަވެސް ހުރިހާ ކަމަކަށް މުޅިން އެއްބަސްވެވިފައި ނެތް ކަމަށް ވެސް މީޑިއާތަކުން ބުނެ އެވެ.

ވެސްޓް ހޭމް އިން ސީނިއާ ކެރިއަރު ފެށި އުމުރުން 24 އަހަރުގެ ރައިސް ވަނީ އެކުލަބަށް ކުޅެދިން 245 މެޗުގައި 15 ލަނޑު ޖަހައިފަ އެވެ. އޭގެ ތެރެއިން މި ސީޒަނުގައި އޭނާ ވަނީ އެ ޓީމަށް 50 މެޗު ކުޅެދީ، ފަސް ލަނޑު ޖަހައިފަ އެވެ. މި ސީޒަނުގައި ވެސްޓް ހޭމް އިން ޔުއެފާ ޔޫރޮޕާ ކޮންފަރެންސް ލީގު ކާމިޔާބު ކުރުމުގައި ވެސް ރައިސް ވަނީ މުހިންމު ދައުރެއް އަދާކޮށްފަ އެވެ.