ޓެރެރިޒަމަށް ފައިސާ ހޭދަކުރުން ހުއްޓުވުމަށް އެމެރިކާއާއެކު ޤަތަރުން އެއްބަސްވުމެއްގައި ސޮއި ކުރުމުން "ނުފުދޭ" ކަމަށް ޤަތަރާ ދެކޮޅަށް ދަތިކުރުމުގެ ފިޔަވަޅުތައް އަޅާފައިވާ އަރަބި ހަތަރު ގައުމުން ނެރެފައިވާ ގުޅިފައިވާ ބަޔާނެއްގައި ބުނެފިއެވެ.

އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލަރސަން ދޯހާއަށް ކުރެއްވި ދަތުރުފުޅުގައި އިއުލާނު ކުރެވުނު އެއްބަސް ވުމަކީ ޓެރެރިޒަމަށް ވާގިވެރިވުން ހުއްޓާލުމަށް އެ ހަތަރު ގައުމުން މި ވޭތުވެދިޔަ ދުވަސްތަކުގައި ބާރު އަޅަމުންދިއަ ދިއުމުގެ ނަތީޖާ އެވެ.

ސައުދީ އަރަބިއްޔާ ބަހްރެއިން، މިސްރު އަދި ޔުނައިޓެޑް އަރަބް އެމިރޭޓްސް އިންދަނީ ޤަތަރުން ޓެރެރިޒަމަށް ފައިނޭސްކޮށް ވާގިވެރިވަމުންދާ ކަމަށް ތުހުމަތުކުރަމުންނެވެ. ޤަތަރުން ދަނީ އެ ތުހުމަތުތައް ދޮގުކުރަމުންނެވެ.

"މި ފިޔަވަޅަކީ އެކަށީގެންވާ މިންވަރެއް ނޫން" ކަމަށް ސައުދީގެ ދައުލަތުގެ މީޑިއާ އެސްޕީއޭއިން އާއްމުކުރި ބަޔާނެއްގައި ބުނެފައި ވެއެވެ.

މީގެ އިތުރުން ޓެރެރިޒަމަށް ވާގިވެރިވުމާއި، ޓެރެރިސްޓުންނަށް އެގައުމުން ހިމާޔަތް ދިނުމާއި ހުރިހާ ގޮތަކުން ޓެރެރިސްޓުންނަށް ފައިސާ ޚަރަދު ކުރެވޭ ހުރިހާ ގޮތްތަކަކާ ދެކޮޅަށް އެ ގައުމުގެ އިދާރާތަކުން މަސައްކަތް ކުރަނީ ކިހާ ސީރިއަސްކަމާ އެކުތޯ ހަތަރު ގައުމުން ބަލަމުން ގެންދާނެ ކަމަށް ބުނެފައި ވެއެވެ.

ހަތަރު ގައުމުން ޤަތަރަށް ހުށަހަޅާފައިވާ ޑިމާންޑްތައް ފުރިހަމަ ކުރަން އެއްބަސްވަންދެން  އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ކުރިޔަށް ގެންދާނެ ކަމަށް ވެސް ބަޔާނުގައި ބުނެފައި ވެއެވެ.

އެ ޑިމާންޑްތަކުގެ ތެރޭގައި ޓެރެރިޒަމާ ދެކޮޅަށް ހަނގުރާމަ ކުރުމާއި ސަރަހައްދުގެ ހަމަޖެހުމާއި ސަލާމަތް ގާއިމްކުރުން ހިމެނެއެވެ.

ޖޫން މަހުގެ 5 ވަނަ ދުވަހު ހަތަރު ގައުމުން ޤަތަރާ ގުޅުން ކަނޑާލާފައި ވަނީ އެ ގައުމުން ޓެރެރިޒަމަށް ވާގިވެރިވާ ކަމަށް ތުހުމަތުކޮށް އީރާނާ އެކު ގާތް ގުޅުން އޮންނާތީ އެވެ. ޓެރެރިޒަމާ ބެހޭ ގޮތުން ކުރާ ތުހުމަތު ގަތަރުން ދޮގުކުރެއެވެ.

ސައުދީ އިސްވެ އޮވެ  ޖޫން މަހުގެ 22 ވަނަ ދުވަހު ޤަތަރަށް ހުށަހެޅި 13 ޑިމާންޑަށް އެ ގައުމުންވަނީ ދެކޮޅު ހަދާފައެވެ. އެ ޑިމާންޑްތަކުގެ ތެރޭގައި އަލްޖަޒީރާ ބަންދު ކުރުމާއި، އިރާނާއެކު އޮންނަ ގުޅުން ކުޑަ ކުރުމާއި ދޯހާގައި އޮންނަ ތުރުކީގެ އަސްކަރީ ބޭސް ބަންދުކުރުން ހިމެނެއެވެ.

ދޯހާގައި  އަންގާރަ ދުވަހު ޤަތަރުގެ އިސް އޮފިޝަލުންނާ ބައްދަލުކުރެއްވުމަށް ފަހު އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލަރސަން އާއި ޤަތަރުގެ ފޮރިން މިނިސްޓަރ ޝެއިޚް މުހައްމަދު ބިން އަބްދުއްރަހްމާން އަލްޘާނީ ވަނީ "ޓެރެރިޒަމަށް ފައިނޭންސްކުރުމަށް" އަމާޒުކޮށް އެއްބަސްވުމެއްގައި ސޮއިކުރެއްވިކަން އިއުލާނުކުރައްވާފައެވެ.

ދެ ބޭފުޅުން ގުޅިވަޑައިގެން ދޯހާގައޮ ބޭއްވި ނޫސްކޮންފަރެންސްގައި ޓިލަރސަން ވިދާޅުވީ އެއްބަސްވުން ބިނާކޮށްފައިވާނީ މެއި މަހު ބޭއްވުނު ރިޔާޟް ސަމިޓްގައި އެއްބަސްވެވުނު ގޮތަށް ދުނިޔެއިން ޓެރެރިޒަމް ފޮހެލުމަށް ކަމަށެވެ.

ޓިލަރސަން ވިދާޅުވީ  ޓެރެރިޒަމަށް ފައިސާ ޚަރަދުކުރާ ފަރާތްތައް ހޯދުމަށް ޤަތަރާއި އެމެރިކާއިން ގުޅިގެން އިތުރަށް މަސައްކަތް ކޮށް އަދި ސަރަހައްދުގެ ސަލާމަތާއި ގައުމުގެ ސަލާމަތަށް މަސައްކަތްކުރައްވާނެ ކަމަށެވެ.

ޤަތަރުގެ ފޮރިން މިނިސްޓަރ ޝެއިޚް މުހައްމަދު ވިދާޅުވީ ކައުންޓަރ ޓެރެރިޒަމަށް ފައިސާ ޚަރަދުކުރުން ހުއްޓުވުމަށް ވޮޝިންގޓަނާ އެކު އެ ސަރަހައްދުން ފުރަތަމަ ސޮއިކުރި ގައުމަކީ ޤަތަރު ކަމަށެވެ.