މިސައިލުން ދިފާއުވާ ނިޒާމު ކަމަށްވާ، ޓާމިނަލް ހައި އެލްޓިޓިއުޑް އޭރިއާ ޑިފެންސް (ތާޑް) މިސައިލް ސިސްޓަމް، އެމެރިކާ އިން އަންގާރަ ދުވަހު ޓެސްޓްކޮށްފިއެވެ.
"ތާޑް" ޑިފެންސް ސިސްޓަމް އެެމެރިކާ އިން އަންގާރަ ދުވަހު ޓެސްޓްކުރީ ޕެސިފިކް ކަނޑުގައި ސިމިއުލޭޓެޑް މެދުރާސްތާގެ ބެލިސްޓިކް މިސައިލެއް ވައްޓާލައިގެންނެވެ. އަންގާރަ ދުވަހު އެމެރިކާ އިން ކުރި "ތާޑް" ޑިފެންސް ސިސްޓަމް ގެ ކުރިން އެ ސިސްޓަމް ބޭނުން ކޮށްގެން އިންޓަސެޕްޓް ކޮށްފައި ވަނީ ހަމައެކަނު ކުރު ރާސްތާގެ މިސައިލްތަކެވެ.
އެމެރިކާގެ މިސައިލް ޑިފެންސް އެޖެންސީ (އެމްޑީއޭ)ގެ ޑިރެކްޓަރު ޖިމް ސީރިން ވިދާޅުވީ މިއީ ވަރަށް މުހިންމު ޓެސްޓެއް ކަމަށާއި އެއީ އެމެރިކާގެ ސަލާމަތަށްޓަކައި ކޮންމެހެން ބޭނުންވާ ނިޒާމެއް ކަމަށެވެ.
އުތުރު ކޮރެއާ އިން ދަނީ ތަކުރާރުކޮށް މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތައް ހިންގަމުންނެވެ. އެކަމުގެ ސަބަބުން ދެކޮރެއާ ސަރަހައްދު ވަނީ ހަލަބޮލިވެފައެވެ. އަދި އެމެރިކާ އާއި އުތުރު ކޮރެއާގެ ގުޅުން ވެސް ވަނީ ވަރަށް ގޯސްވެފައެވެ. އުތުރު ކޮރެއާ އިން ކުރާ މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތަކާ ގުޅިގެން އދ. އިން ދާދިފަހުން ވަނީ އުުތުރު ކޮރެއާ އާ ދެކޮޅަށް އާ ދަތިކުުރުމުގެ ފިޔަވަޅުތަކެއްް ވެސް އަޅާފައެވެ.
މި ޖުލައި ކުރީކޮޅު އެމެރިކާ އިން ބުނެފައި ވަނީ "އަސްކަރީ ބާރު ބޭނުން ކުރަން ޖެހިއްޖެ ނަމަ އެކަން ކުރާނެ" ކަމަށެވެ.
