ހޯރަފުށީ އާދަމް ސަލީމް ހެއްދެވި ޅެމެއްގައިވެ އެވެ. "ދަގަނޑުކަމުގައި ވަނީނަމަ ރަނުން އުއްތިޔަސް، ދަބަރު ހިލުވާނެކަން އަންގައިދޭ ދަރެހެކޭ" އެވެ.
ބައު ދަގަނޑުގަނޑެއްގެ ބޭރު ކިތަންމެ ވަރަކަށް ރަނުން ޖަރީކޮށް ގިރިޓީ ކުރިޔަސް، ކޮންމެ ކަހަލަ ދަވާދެއް ލިޔަސް، އާޚިރުގައި އެއިން ހަމަ ދަބަރު ހިލޭނެއެވެ. މިއީ އިންސާނުންގެ ލޯމައްޗަށް ދުނިޔޭގައި ފެންނާނެ ބޮޑު ހަގީގަތެކެވެ.
މި ހަގީގަތް އެންމެ ގާތުން ފެންނަ އެއް ކަމަކީ ޑިމޮކްރަސީގެ ތޮފި ނަންގަވައިގެން ތިއްބަވާ ސިޔާސީ ވެރިންގެ ބަސްތަކާއި އަމަލުތަކެވެ. ދުނިޔޭގެ ކޮންމެ ހިސާބަކަަށް ނަޒަރު ހިންގައިލިޔަސް، މި ނޫން މަންޒަރެެއް ފެންނާކަށް ނެތެވެ.
ޑިމޮކްރަސީގެ ބައްޕަކަމަށް ދައުވާކުރައްވާ ސިޔާސީ ވެރިން ގައުމުތަކުގައި މަދެއް ނޫނެވެ. ޑިމޮކްރަސީއަކީ ތިމަން މަނިކުފާނަށް ސީދާ ހެޔޮވަރުކޮށްފައިވާ ކޯޓެއްކަމަށް ވިދާޅުވެ، ތިމަން މަނިކުފާނު މި ހުންނަވަނީ ރެޔާއި ދުވާލު އެ ކޯޓު ތުރުކުރައްވައިގެންކަމަށް ވިދާޅުވާ ބޭފުޅުންވެސް މަދެއްނޫނެވެ. ނަމަވެސް އާޚިރުގައި އެ ދަގަނޑުގަނޑުން ދަބަރު ހިލެއެވެ.
އެފަދަ ބޭފުޅުންގެ ދޫފުޅުން އެންމެ ގިނައިން ބޭރުވާ ބަސްތަކުގެ ތެރޭގައި؛ "ޑިމޮކްރަޓިކް އުސޫލު"، "ވޯޓުން ކަންކަން ނިންމުން"، "މެޖޯރިޓީއަށް ތަބާވުން"، "ބަލި ގަބޫލުކުރުން"، "ޚިޔާލާއި މަޝްވަރާ ހޯދުން"، ހިމެނެއެވެ. މިއީ ހަމަ ހަގީގަތުގައިވެސް ޑިމޮކްރަސީގައި ކަން ހިނގަމުން އަންނާންވާނެ ގޮތެވެ.
އެހެންނަމަވެސް ވޯޓުން ކަމެއް ނިންމައިފިނަމަ، އެ ނިންމުމަކަށް އިހުތިރާމުކުރައްވާ ތަން ނުފެނުން، އަދި އެބޭފުޅާ ބޭނުންފުޅުވާ ގޮތް ނޫން ގޮތެއް ރަނގަޅުނުވުން، މެޖޯރިޓީއެއް މައިނޯރިޓީއެއް ބެއްލެވުމެއްނެތި އަމިއްލަ އެދުންފުޅު އިސްކުރެއްވުން، މިއީ އެ ބޭފުޅުންގެ ދޫފުޅުން ބޭރުނުވާ، އެހެނަސް އެއްކަލަ ގިރިޓީކަން ކެނޑިގެންދާއިރު ހާމަވާ ދަބަރުގެ މިސާލެކެވެ.
ބައެއް މީހުން ބުނާގޮތުގައި ރާއްޖެއިންވެސް އެ މަންޒަރު ފެނެއެވެ. ޑިމޮކްރަސީއޭ ވިދާޅުވަމުން، ހަމަ އަނެއް ސިކުންތުގައި ޑިމޮކްރަސީއަށް "މޮކް" ކުރައްވާ ބޭފުޅުން ރާއްޖެއިންވެސް ފެނެއެވެ. ދުނިޔޭގެ އެހެން ތަންތަނުގައިވެސް އޮންނަ ކަމެއް ރާއްޖެއަށްވެސް ވަކި ލައްވާނުލައި ނުދާނެތާއެވެ.
ކޮންމެއަކަސް، ދެރައީ، ބާ ދަގަނޑުގަނޑެއްގައި ގިރިޓީކުރައްވައިގެން އެއީ ރަންކަމުގައި ހައްދަވައިގެން ރައްޔިތުންނަށް އެ ވިއްކެވުމަށް ވަޑައިގަންނަވާކަމެވެ. އާންމު އާދައިގެ ރައްޔިތުމީހާ ބޮޑު އަގު ދީފައި އެ ދަގަނޑުގަނޑު ގަންނަކަމެވެ.
ދިރިއުޅުން އުޖާލާވާނެކަމުގެ އުއްމީދުގައި މި ގަނެވެނީ ރަނުން ގިރިޓީކޮށްފައިވާ އާދައިގެ ދަގަނޑުގަނޑެއްކަމެއް ނިކަމެތި ރައްޔިތުމީހާއަކަށް ގިނަ ފަހަރު ނޭނގެއެވެ. އެހާވެސް ރަނުގެ ގިރިޓީގެ އޮފުދާރުކަން ބޮޑެވެ.
ގިނަފަހަރު އެ ގިރިޓީކަން ނެތިގޮސް، އަސްލު ދަބަރުގެ ކުލަގަނޑު ފާޅުވާއިރު، އޮންނަނީ ރައްޔިތުނަށް "ވާންވީ ހައެތި" ވެފައެވެ.
އެހައިހިސާބުން ދެން ތިބެންޖެހެނީ ހިތުހުރި ގޮތަކަށް އާރާއި ބާރުގެ ބޭނުންކުރައްވައިގެން، އަމިއްލަ އެދުންފުޅުތައް ހާސިލުކުރެއްވުމަށް މުޅި ގައުމު ގުރުބާންކުރާ މަންޒަރު ބަލާށެވެ.
މަރުހޫމް އާދަމް ސަލީމް އެ ވިދާޅުވެފައިވަނީ ނިކަން ބުއްދިވެރި ވާހަކަފުޅެކެވެ. ދަގަނޑުކަމުގައި ވަނީނަމަ ރަނުން އުއްތިޔަސް، ދަބަރު ހިލުވާނެކަން ހަމަ ގައިމެވެ.
