ބޮލީވުޑްގެ ފިލްމީތަރި އަމީތާބް ބައްޗަންއަށް މިއަރު 75 އަހަރު ފުރުނުކަމުގައި ވިއަސް 78 އަހަރު ފުރެންދެން އޭނާ ފިލްމު ކުޅޭނެ ކަމަށް ބުނެފިއެވެ.

އަމީތާބް ބުނީ އޭނާ ފިލްމު ކުޅޭނީ 2019 އާ ހަމައަށް ކަމަށެވެ. އަދި 2019 ވަނަ އަހަރާ ހަމައަށް އޭނާ ފިލްމު ކުޅޭނެ ކަމަށް އަމީތާބް ބުނެފައި ވަނީ އޭނާގެ ބްލޮގްގައި އާދީއްތަ ދުވަހުއެވެ.

އަމީތާބް ބުނެފައިވަނީ އޭނާގެ ފިލްމު "102 ނޮޓް އައުޓް" ގެ ޝޫޓިން އަނެއްކާ ވެސް ފެށުމަށް ތައްޔާރު ވަމުންދާ ކަމަށާއި އޭގެ ޝޫޓިން ނިންމާލުމަށް ފަހު އޮގަސްޓު މަހުގެ ތެރޭގައި އޭނާގެ ޝޯ "ކޭބީސީ" ގެ ޝޫޓިން ފަށާނެ ކަމަށެވެ. އަދި އޭނާގެ އެކްޓިން ދާއިރާ 2019 ވަންދެން ކުރިއަށް ގެންދާނެ ކަމަށް އަމީތާބް ބުންޏެވެ.

ހިންދީ ފިލްމީ މަސްރަހަށް އަމީތާބް ތަޢާރަފްވެގެން ދިޔައީ 1969 ވަނަ އަހަރު ނިކުތް ޑައިރެކްޓަރ ކޭއޭ އައްބާސްގެ "ސާތު ހިންދުސްތާނީ" އެވެ.  އަމީތާބް މަޝްހޫރުވެފައި ވަނީ ފިލްމަކީ 1971 ވަނަ އަހަރު ނިކުތް "އާނަންދު" ންނެވެ.  އަމީތާބް އުފަންވެފައި ވަނީ އޮކްޓޯބަރ 11، 1942 ވަނަ އަހަރުއެވެ.

އަމީތާބް ވަނީ ތިން ނޭޝަނަލް އެވޯޑް އަދި 12 ފިލްމް ފެއަރ އެވޯޑް ހޯދާފައެވެ. ފިލްމް ފެއަރ ބެސްޓް އެކްޓަރ އެވޯޑް އަށް އެންމެ ގިނައިން ނޮމިނޭޓްވުމުގެ ޝަރަފް ނުވަތަ ރިކޯޑް ވެސް އޮތީ އަމީތާބްގެ އަތުގައެވެ. އިންޑިޔާގެ ޕާލަމެންޓްގެ މެންބަރުކަން 1984 ން 1987 އަށް ވެސް އަމީތާބް ކޮށްފައި ވެއެވެ.