މީސް މީޑިއާގައި އެންމެ ގަދަޔަށް ދެކެވެމުން އަންނަ ބެންޒެމާ ރެއާލް ދޫކޮށްލާކަމުގެ ވާހަކަ ބެންޒެމާ ދޮގުކޮށްފިއެވެ.
ސްޕެނިޝް ސްޕޯޓްސް ނޫހެއްކަމަށްވާ "މާކާ" އިން ބޭއްވި ރަސްމިއްޔާތެެއްގައި ބެންޒެމާ ބުނީ ރެއާލް ދޫކޮށްލުމުގެ ވާހަކަ އަކީ އެއްވެސް ހަގީގަތެއް ނެތް ވާހަކައެއްކަމަށެވެ. އޭނާ ބުނީ މިވަގުތު އޭނާ ހުރީ ރެއާލް މެޑްރިޑްގައި ވަރަށް އުފަލުން ކަމަށެވެ. އަދި ރެއާލް މެޑްރިޑްގެ ފަރިތަކުރުންތަކުގައި ބައިވެރިވަނީ ވަރަށް އުފަލުން ކަމަށާ، އެއީ ވަޒީފާއެއްގެ ގޮތުގައި އެއްވެސް އިރަކު ނުދެކޭ ކަމަށެވެ. އަދި އެއީ ވަޒީފާއެއް ކަމުގައި ދެކޭނަމަ، މިހާރު ޓީމު ދޫކޮށްފައި ގޮސްފާނެކަމަށް ބެންޒެމާ ބުންޏެވެ.
މިވަގުތު ކްރިސްޓިއާނޯ ރޮނާލްޑޯ ކުޅެމުން އަންނަ ލީގު ކަމަށްވާ ސައުދީ ޕްރޮފެޝަނަލް ލީގުގެ ޓީމަކުންވެސް ވަނީ ބެންޒެމާއަށް ބޮޑު އަގެއް ހުށަހަޅާފައެވެ. އެ ލީގުގެ ޓީމުތަކުން ދަނީ ގިނަ އަދަދެއްގެ މަޝްހޫރު ކުޅުންތެރިން ގަތުމުގެ މަސައްކަތް ކުރަމުންނެވެ. އޭގެތެރޭގައި މެސީ އަދި މޮޑްރިޗް ފަދަ ކުޅުންތެރިންވެސް ހިމެނެއެވެ.
މާކާ އިން ބޭއްވި ރަސްމިއްޔާތުގައި ބެންޒެމާއަށް ވަނީ ޚާއްސަ އެވޯޑެއްވެސް ދީފައެވެ. އެއީ މާކާގެ ފަރާތުން ކުލަބުގައި ފާހަގަކޮށްލެވޭ މޮޅެތި ކުޅުންތެރިންނަށްދޭ އެވޯޑެކެވެ.
ލީގުގައި ބާކީ އެއް މެޗު އޮތްއިރު ބެންޒެމާ ވަނީ 18 ލަނޑު ޖަހާފައެވެ. އެންމެ ގިނަ ލަނޑު ޖަހާފައިވަނީ ބާސެލޯނާގެ ލެވަންޑޯސްކީއެވެ.
