ފީފާ ވޯލްޑް ކަޕުގައި ކުޅުނު އިނގްލެންޑުގެ ޓީމަށް ހަ ބަދަލެއް ގެނެސް، ޔޫރޯ ކޮލިފިކޭޝަންގެ ސްްކޮޑް އާންމުކޮށްފިއެވެ.

ޖޫން މަހު މަލްޓާ އާއި ނޯތު މެސެޑޯނިއާ އާ ދެކޮޅަށް ކުޅޭ ޔޫރޯ 2024 ގެ ކޮލިފިކޭޝަން މެޗުތައް ކުޅުމުގެ ފުރުސަތު، މި ސީޒަނުގައި ރަނގަޅު ކުޅުމެއް ދެއްކި ބައެއް ކުޅުންތެރިންނަށް ވަނީ ދީފައެވެ. އަދި ވޯލްޑް ކަޕު ޓީމުގައި ހިމެނުނު މަޝްހޫރު ބައެއް ކުޅުންތެރިންނަށް ފުރުސަތު ނުލިބެއެވެ.

ޓީމަށް ހަ ބަދަލެއް ގެނައި އިރު، ނިކް ޕޯޕް، ކޯނޯ ކޯޑީ އަދި އެރިކް ޑަޔާގެ ޖާގަ ވަނީ ގެއްލިފައެވެ. ޓީމަށް ނުނަގާ ބައެއް ބޮޑެތި ނަންތަކުގެ ތެރޭގައި، އާސެނަލްގެ ބެން ވައިޓް އަދި ޗެލްސީގެ މޭސަން މައުންޓާއި ރަހީމް ސްޓާލިންގ ހިމެނެއެވެ. މި ކުޅުންތެރިންގެ ބަަދަލުގައި ޓީމަށް ނަގާފައިވަނީ ސެމް ޖޯންސްޓަން، ލެވިސް ޑަންކް, މާކް ގުއެހީ، މިންގްސް، އެޒޭ އަދި ޖޭމްސް މެޑިސަން އެވެ.

ޔޫރޯ ކޮލިފިކޭޝަން މެޗުތަކަށް ނެގި ޓީމުން ބެލިންގްހަމް ފިޔަވާ ހުރިހާ ކުޅުންތެރިންވެސް ކުޅެނީ އިނގިރޭސި ޕްރިމިއަރ ލީގުގައެވެ. ޓީމުގެ ކޯޗަކީ ގެރެތު ސައުތުގޭޓެވެ.