ސްޕެއިންގެ ރެއާލް މެޑްރިޑަށް ކުޅެމުން އަންނަ އަލްވާރޯ މޮރާޓާ ހޯދުމަށް އިނގިރޭސި ކްލަބް ޗެލްސީއިން ބިޑްކުރަން ތައްޔާރަށް އޮތްކަމަށް ރިޕޯޓްތައް ބުނެފިއެވެ.

ބޭރުގެ ކުޅިވަރު ހަބަރު ފަތުރާ މީޑިއާއެއް ކަމަށްވާ އޭއެސް އިން ރިޕޯޓްކޮށްފައިވާ ގޮތުގައި ޗެލްސީއިން ވަނީ މޮރާޓާ ހޯދުމަށް 80 މިލިއަން ޕައުންޑުގެ ބިޑެއް ތައްޔާރުކޮށްފައެވެ. އެގޮތުން ޗެލްސީއިން މަސައްކަތް ކުރަމުން އަންނަނީ މޮރާޓާ އާއި އެކު 5 އަހަރު ދުވަހުގެ އެއްބަސްވުމަކަށް އައުމަށް ކަމަށްވެސް ރިޕޯޓްތަށް ބުނެއެވެ.

ޗެލްސީއިން މީގެކުރިން މަސައްކަތް ކޮށްފައިވަނީ އެކުލަބަށް ކުރިން ކުޅުނު ރޮމެލޫ ލުކާކޫ އާއި އެކު އެއްބަސްވުމަކަށް އައުމަށެވެ. ނަމަވެސް ރިޕޮޓާތަށް ބުނާގޮތުން ލުކާކޫ އާއި އެކު މެންޗެސްޓާ ޔުނައިޓޭޑުން ވަނީ އެއްބަސްވުމަކަށް އާދެވިދައެވެ. އެގޮތުން އޭނާ ވަނީ ޔުނައިޓެޑާއި ގުޅުމަށް އާދީއްތަ ދުވަހު މެޑިކަލްވެސް ފުރިހަމަކޮށްފައެވެ. އެހެންކަމުން މިހާރު ޗެލްސީއިން މަސައްކަތް ކުރަމުން އަންނަނީ ކުރިން ޔުނައިޓެޑުން ހޯދަން މަސައްކަތްކުރި މޮރާޓާ އާއި އެކު އެއްބަސްވުމަކަށް އައުމަށެވެ.

ޔުނައިޓެޑުން މިފަހަރުގެ ޓްރާންސްފާގައި މޮރާޓާއަށް ވަނީ ބިޑްކޮށްފައެވެ. ނަމަވެސް ރެއާލް މެޑްރިޑުން ބިޑް ރެޖެކްޓް ކޮށްލާފައިވަނީ ހުށައަޅާފައިވާ އަގު ކުޑަވުމުން ކަމަށް ރިޕޯޓްތައް ވަނީ ބުނެފައެވެ. ރިޕޯޓްތައް ބުނާ ގޮތުން ރެއާލްއިން 90 މިލިއަން ޕައުންޑަށް ވުރެ ކުޑަ އަގަކަށް މޮރާޓާ ވިއްކާލަން ބޭނުން ނުވާއިރު ޔުނައިޓެޑުން އޭނާއަށް ހުޝައެޅީ 70 މިލިއަން ޕައުންޑެވެ.

ޗެލްސީއިން މޮރާޓާއަށް އަމާޒު ހިފާފައި ވާއިރު، ދާދި ފަހުން ސްޕެއިންގެ ނޫހަކަށް ދިން އިންޓަވިއު އެއްގައި ރެއާލް މެޑްރިޑުގެ ރައީސް ފްލޮރެންޓީނޯ ޕެރޭޒް ވިދާޅުވީ، މޮރާޓާ އަވަސް މުސްތަގުބަލެއްގައި ރެއާލް ދޫކޮށްލާނެކަމަށް އޭނާ ނުދެކޭ ކަމަށާއި، ކްލަބުންވެސް މޮރާޓާ ދޫކޮށްލަން ބޭނުންނުވާ ކަމަށެވެ. ނަމަވެސް ރެއާލްގެ ޕްރީސީޒަންގައި ބައިވެރިވާން މޮރާޓާ ބޭނުން ނުވާކަމަށް ދެކެވޭ ވާހަކަ ތަކެއްވެސް ދާދި ފަހުން ވަނީ ފެންމަތި ވެފައެވެ.

ރެއާލް މެޑްރިޑުން 2010 ވަނަ އަހަރު ސީނިއާ ކްލަބް ލެވެލް ކެރިއަރު ފެށި މޮރާޓާ ރެއާލް ދޫކޮށްލުމަށްފަހު ޔުވެންޓަސްއަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި އޭނާ ވަނީ ދެ ސީޒަން ހޭދަކޮށްފައެވެ. އެމުއްދަތުގައި އެޓީމަށް ކުޅުނު 93 މެޗުގައި 31 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލިގުގެ ދެވަނަ ވެސް ޔުވަންޓަސްއާއެކު ކާމިޔާބުކޮށްފައެވެ.

ޔުވަންޓަސް ދޫކޮށްލުމަށްފަހު މޮރާޓާ ރެއާލަށް ބަދަލުވީ މި ސީޒަނުގައެވެ. އެގޮތުން އޭނާ ވަނީ މިވީތަނަށް މި ސީޒަނުގައި އެޓީމަށް ކުޅުނު 43 މެޗުގައި 20 ލަނޑު ކާމިޔާބުކޮށްފައެވެ.