އަމީނީ މަގުގެ 6 އަދި 7 ވަނަ ސެގްމެންޓުގެ އެތެރޭގައި ކުރަންޖެހޭ ހުރިހާ މަސައްކަތެއް ނިމިފައިވާ ކަމަށާއި، މިމަހުގެ 25 ވަނަ ދުވަހު ތާރުއަޅައި، ދެ ދުވަހުގެ ތެރޭގައި އާއްމުންނަށް ހުޅުވާލާނެކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ އެމްޑީ, މޫސާ އަލީ މަނިކު (މޫކޭ) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މޫކޭ ވިދާޅުވީ އަމީނީ މަގުގެ މަސައްކަތަކީ މުޅި ރާއްޖޭގެ ހުރިހާ ރައްޔިތުން ބަލަމުންދާ މަސައްކަތެއް ކަމަށާއި، އެހާމެ މައްސަލަ ބޮޑުވި މަޝްރޫއެއް ކަމަށެވެ. ގިނަ ގޮންޖެހުންތަކާއެކު މަސައްކަތްތައް ކުރިއަށްދާކަން ފާހަގަކުރައްވައި މޫކޭ ވިދާޅުވީ 1، 2 އަދި 3ގެ ސެގްމެންޓް ނިމިފައިވާކަމަށާއި، މިހާރު ހަދަމުންދާ 6 އަދި 7ގެ ސެގްމެންޓްގެ ގްރައުންޑްގައި ކުރަމުންދާ ހުރިހާ މަސައްކަތެއް ނިމިފައިވާކަމަށެވެ. އަދި މިމަހުގެ 25 ވަނަ ދުވަހު ތާޅުއެޅުމުގެ މަސައްކަތް ކުރާނެކަމަށް އޭނާ ވިދާޅުވިއެވެ.
މިހާރުގެ އަޕްޑޭޓަށް ބަލާއިރު؛ ގާތްގަނޑަކަށް ކޭބަލް ޓްރޭގެ 100 އިންސައްތަ ނިމި، ފެނާ ނަރުދަމާގެ ހޮޅިތަކުގެ ކަނެކްޝަން 100 އިންސައްތަ ނިމި، އަޑީގަ ކުރަންޖެހޭ ހުރިހާ މަސައްކެއް ނިމިފަ. މިހާރު ޕޭވިންގގެ މަސައްކަތް ކުރިއަށް އެދަަނީ. އެއާއެކު އަޅުގަނޑުމެން މިހާރު ވެސް ގްރައުންޑް ލެވެލްގެ މަސައްކަތްތައް ކުރިއަށް އެބަދޭ. ތާރުއެޅުމަށްޓަކާ ވާންޖެހޭ ތައްޔާރީތައް މިހާރު ވަމުން މިދަނީ. މިމަހު 25 ވަނަ ދުވަހު ތާރު އެޅުމުގެ މަސައްކަތް ފަށައިގަންނަން. އެހެންވީމަ 25ގަ ފަށައިގެން 2 ދުވަހުގެ ތެރޭގަ ހުރިހާ މަސައްކަތެއް ނިންމާލެވޭނެ. ދާ ސްޕީޑާމެދު ހިތްހަމަޖެހޭ. ކޮލިޓީއާމެދު ޝައްކެއްނެތް. އެއްޗަކަށް ގެއްލުންނުވެ އާދެވުނީ ވަރަށް ފަރުވާތެރިކަމާއެކު މަސައްކަތް ކުރާތީ.އެމްޑީ، މޫސާ އަލީ މަނިކު
މޫކޭ ވިދާޅުވީ އަމީނީ މަގުގެ މަސައްކަތަކީ އުންމީދުކުރިވަރަށްވުރެ އުނދަގޫ މަޝްރޫއެއްކަމަށެވެ. އެމަގުގެ އަޑީގައި އުރީދޫ، ދިރާގު، އަދި ސްޓެލްކޯގެ ކޭބަލްތައް ވަޅުލާފައިވާއިރު، މަސައްކަތް ކުރިއަށްގެންދަނީ ވަރަށް ވިސްނުންތެރިކަމާއެކު ކަމަށެވެ. ކޭބަލަކަށް މައްސަލައެއް ދިމާވެއްޖެނަމަ ރާއްޖޭގެ މުހިންމު އިދާރާތަކުގެ ނެޓްވޯރކްތަކަށް ބުރޫއަރާނެކަން އޭނާ ފާހަގަކުރެއްވިއެވެ.
މޫކޭ ވިދާޅުވީ މުޅިން އައު ނެޓްވޯރކެއް ގާއިމްކުރުމުގެ މަސައްކަތް ކުރަމުންދާއިރު ހަރަދުވެސް ބޮޑުވާނެ ކަމަށެވެ. އަދި މަގު ޒަމާނީ ފެންވަރަށް ތަރައްގީކުރަމުންދަނީ އެންމެންނަށް ބޭނުންކުރެވޭހެން ރައްކާތެރިކޮށްކަމަށް އޭނާ ވިދާޅުވިއެވެ. އެގޮތުން ލޯފަން މީހުންނާއި، އެހެނިހެންވެސް ނުކުޅެދުންތެރިކަން ހުންނަ މީހުންނަށް ފަސޭހަކަމާއެކު އަމީނީ މަގު ބޭނުންކުރެވޭނެކަމަށް މޫކޭ ވިދާޅުވިއެވެ.
އާރްޑީސީގެ މަސައްކަތްތަކަށް އިޝާރާތްކުރައްވައި މޫކޭ ވިދާޅުވީ، މިދިޔަ އަހަރު ފީސީބީ އެކުންފުންޏާ ބެހޭގޮތުން ނެރުނު ރިޕޯޓާ ގުޅިގެން ގިނަ ބައެއްގެ ފާޑު ކިޔުން އަމާޒުވެގެންދިޔަ ކަމަށެވެ. މިދިޔަ އަހަރު ކުންފުނި ގެއްލުމުގައި ހިންގިނަމަވެސް މިއަހަރު އާރްޑީސީއަށް ފައިދާވެފައިވާކަމަށް މޫކޭ ވިދާޅުވިއެވެ. އަދި ވިދާޅުވީ މިއީ އާރްޑީސީއަށް ލިބުނު ވަރަށް ބޮޑު ކުރިއެރުމެއް ކަމަށާއި، ކުރިއަށް އޮތް ތަނުގައިވެސް އެގޮތަށް މަސައްކަތްކުރާނެ ކަމަށެވެ.
