މި ސީޒަނުގައި ތިން ތަށި ކާމިޔާބު ކުރުމުގެ ފުރުސަތު ލިބިފައިވާ މެންޗެސްޓަރ ސިޓީ އަށް އެންމެ މުހިންމީ އިނގިރޭސި ޕްރިމިއާ ލީގު ތަށި ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ ލީގުގައި ޗެލްސީއާ ދެކޮޅަށް ނިކުންނަ މެޗުގެ ކުރިން ވާހަކަ ދައްކަމުންނެވެ. ޗެލްސީ މެޗުން މޮޅުވެ، ސިޓީ އަށް މި ސީޒަނުގެ ޕްރިމިއާ ލީގު ކާމިޔާބު ކުރުމުގެ ފުރުސަތު އޮންނާނެ އެވެ. އެއީ އާސެނަލް އެންމެ ފަހުން ކުޅުނު މެޗުން ބަލިވެފައި އޮތުމުންނެވެ. އޭނާ ބުނީ ޔުއެފާ ޗެމްޕިއަންސް ލީގުގެ ފައިނަލްގައި އޮތުމަކީ ސިޓީ އަށް ލިބޭ ވަރަށް ބޮޑު ހިތްހަމަ ޖެހުމެއް ކަމަށެވެ. ނަމަވެސް އޭނާ ބުނީ ޕްރިމިއާ ލީގު ކާމިޔާބު ކުރުމަކީ އުނދަގޫ ކަމެއް ކަމަށާއި، ނަމަވެސް މިހާރު ސިޓީގެ އަމިއްލަ އަތް މަތީގައި ބާރު އޮތް ކަމަށެވެ. އޭނާ ބުނީ މިދިޔަ ދުވަސްތަކުގައި ސިޓީން މަސައްކަތް ކުރީ ލީގު ހޯދުމަށް ކަމަށާއި، މިހާރު އޮތް ހިސާބަށް އާދެވުނީ ވެސް ވަރަށް މަސައްކަތުން ކަމަށެވެ.

ލީގުގައި އާސެނަލުން ނޮޓިންހަމް ފޮރެސްޓާ ދެކޮޅަށް ކުޅޭ މެޗު ބަލާނެތޯ ސުވާލު ކުރުމުން ގާޑިއޯލާ ބުނީ، ނުބަލާނެ ކަމަށެވެ. ސަބަބަކީ ސިޓީ އަށް މުހިންމު މެޗެއް ކުރިއަށް އޮތުން ކަމަށާއި، އޭނާ އަށް ޤަބޫލު ކުރެވެނީ ސިޓީ ޗެމްޕިއަނުންނަށް ވާން ޖެހޭނެ ކަމަށެވެ. އެއީ މިވަގުތު ވިސްނުމުގައި ހުރި ހަމައެކަނި ކަންތައްކަން ފާހަގަކޮށް ގާޑިއޯލާ ބުނީ، ނޮޓިންހަމް މެޗުން ސިޓީ އަށް ކޮންޓްރޯލު ކުރެވޭނެ ކަމެއް ނޯންނާނެ ކަމަށެވެ. އޭނާ ބުނީ ނޮޓިންހަމް މެޗުގައި ކޮންމެ ގޮތަކަށް ކަންތައްވީ ނަމަވެސް، ސިޓީން އެ މީހުންގެ އަތް މަތީގައި އޮތް މެޗު ކާމިޔާބު ކުރަން ޖެހޭނެ ކަމަށެވެ.

އިތުރަށް ގާޑިއޯލާ ބުނީ ސިޓީ އަކީ ވަރުގަދަ ޓީމެއް ކަމަށް ޤަބޫލު ކުރާ ކަމަށެވެ. ޕްރިމިއާ ލީގުގެ ބޮޑެތި ޓީމުތަކުގެ ތެރޭގައި ހިމެނޭ، އާސެނަލް، ލިވަޕޫލް އަދި މެންޗެސްޓަރ ޔުނައިޓެޑު އަތުން ވެސް ސިޓީ މޮޅުވެފައި އޮތުމަކީ އެކަމަަށް ބާރުދޭ ކަމެއް ކަމަށް އޭނާ ޤަބޫލު ކުރެ އެވެ. އޭނާ ބުނީ ސިޓީގެ ކުޅުންތެރިންނަށް ވަރަށް ބޮޑު އިތުބާރެއް އޮންނާނެ ކަމަށާއި، މިވަގުތު ކުޅުންތެރިން ތިބޭނީ ވެސް ވަރަށް ބޮޑު އުންމީދެއްގައި ކަމަށެވެ.

ޗެލްސީގެ ދަނޑުގައި ސިޓީން އެ ޓީމާ ދެކޮޅަށް ނިކުންނާނީ އާދިއްތަ ދުވަހުގެ ރޭ 20:00 ގައެވެ.