އޭޝިޔާގެ އެންމެ ބޮޑު ފުޓްބޯޅަ މުބާރާތްކަމަށްވާ އޭޝިއަން ކަޕުގެ ގުރު ނަގައިފިއެވެ.

އަންނަ އަހަރުގެ ޖެނުއަރީގައި ގަތަރުގައި ބާއްވާ މި މުބާރާތުގައި, މުބާރާތް ބާއްވާ ގައުމުގެ ހައިސިއްޔަތުން ގަތަރު ހިމެނުނީ ގްރޫޕް އޭގައެވެ. މި ގްރޫޕުގައި ދެން ހިމެނެނީ ދެ ފަހަރު މުބާރާތުގެ ފައިނަލް ކުޅެފައިވާ ޗައިނާއާއި ތަޖިކިސްތާން އަދި ލުބުނާނެވެ. މީގެ ތެރެއިން ލުބުނާނަކީ އަންނަ މަހު އިންޑިޔާގައި ފަށާ ސާފް ޗެމްޕިއަންޝިޕުގައި ސާފުގެ ދައުވަތަކަށް ވާދަކުރާނެ ގައުމެކެވެ.

އޭޝިއަން ކަޕަށް ކޮލިފައިވި 24 ގައުމު ބަހާލީ ހަ ގްރޫޕަކަށެވެ. ގަދަ އަށް ޓީމު ސީޑްކުރީ ފީފާ ރޭންކިންގެ ތަރުތީބުންނެވެ.

ގްރޫޕް ބީގައި ހިމެނެނީ 215 ވަނަ އަހަރުގެ ޗެމްޕިއަން އޮސްޓްރޭލިޔާއާއި އުޒްބަކިސްތާން، އަދި ސީރިއާއާއި އިންޑިޔާއެވެ. ތިން ފަހަރު މުބާރާތް ކާމިޔާބުކޮށްފައިވާ އީރާނާއެކު ގްރޫޕް ސީގައި ހިމެނުނީ ޔޫއޭއީއާއި ހޮންކޮގންގ އަދި ފަލަސްތީނެވެ.

ގްރޫޕް ޑީގައި ހިމެނުނީ އިންޑޮނީޝިއާއާއި ވިއެޓްނާމް، އަދި ކުރީގެ ދެ ޗެމްޕިއަނުން ކަމަށްވާ ޖަޕާނާއި އިރާގެވެ. ދެކުނު ކޮރެޔާއާއި މެލޭޝިޔާ، އަދި ޖޯޑަންއާއި ބަހުރޭން ލައްވާލީ ގްރޫޕް އީގައެވެ. އެފް ގްރޫޕުގައި ތިބީ ސައޫދީ އަރަބިއްޔާއާއި ތައިލެންޑް، އަދި ކިރިގިސްތާނާއި އޮމާނެވެ.

މުބާރާތުގެ ގަދަ އަށަކަށް ދާނީ ކޮންމެ ގްރޫޕެއްގެ އެންމެ ކުރިހޯދާ ޓީމާއި ދެ ވަނަ އަށްދާ އެންމެ ގަދަ ދެ ޓީމެވެ.