މިނިވަން ޗެމްޕިއަންޝިޕްގެ ފައިނަލް ބުރުގައި ސ.ފޭދޫ އަދި ތ.ތިމަރަފުށި ބައްދަލުކުރި މެޗު އެއްވަރުވިއިރު، ށ.މިލަންދޫގެ މައްޗަށް އއ.މާޅޮސް ކުރިހޯދައިފި އެވެ.

ހުކުރު ދުވަހު ހަވީރު ފޭދޫ އަދި ތިމަރަފުށި ބައްދަލުކުރި މެޗު އެއްވަރުވީ 0-0 ގެ ނަތީޖާއަކުންނެވެ.

ތިނަދޫގައި ކުޅުނު ގްރޫޕް ޓޫގެ މި މެޗު ފެށިގެން ދެޓީމުގެ ފަރާތުންވެސް މޮޅު ކުޅުމެއް ފެނިގެންގޮސްފައިވާއިރު، ލަނޑު ޖެހުމަށް ރަނގަޅު ފުރުސަތުތަކެއް ދެޓީމަށްވެސް ވަނީ ލިބިފައެވެ.

މި ގްރޫޕްގައި ހިމެނޭ ގދ.ތިނަދޫ އަދި ގދ.ކުޑަހުވަދޫ ބައްދަލުކުރި މެޗުވެސް ނިމުނީ 0-0 ގެ ނަތީޖާއިން އެއްވަރުވެގެންނެވެ. އެގޮތުން މި ގްރޫޕްގައި ހިމެނޭ ކޮންމެ ޓީމަކަށް ވަނީ އެއް ޕޮއިންޓް ލިބިފައެވެ.

ހުކުރު ދުވަހު ހަވީރު ފައިނަލް ބުރުގައި މިލަންދޫގެ މައްޗަށް މާޅޮސް ކުރިހޯދީ 0-2 ގެ ނަތީޖާއަކުންނެވެ.

ކުޅުދުއްފުށީގައި ކުޅުނު މި މެޗުގައި މާޅޮހުގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، ފުރަތަމަ ހާފް ނިމުނީ 0-1 ގެ ނަތީޖާއިން މިލަންދޫގެ މައްޗަށް މާޅޮސް ކުރިހޯދައިގެންނެވެ.

ދެވަނަ ހާފްގައިވެސް މޮޅު ކުޅުމެއް ދައްކާ މާޅޮހުން ވަނީ އިތުރު ލަނޑެއް ކާމިޔާބުކޮށްފައެވެ. މިނަތީޖާއާއެކު މާޅޮސް ވަނީ ތިން ޕޮއިންޓާއެކު ގްރޫޕް ވަންގެ އެއްވަނަ އަށް ޖެހިލާފައެވެ. މުބާރާތުގައި އާދީއްތަ ދުވަހު ކުޅޭ މެޗުގައި ބައްދަލުކުރާނީ ކުޅުދުއްފުށި އަދި މާޅޮހެވެ.