އިނގިރޭސި ޕްރިމިއާ ލީގުގައި ބްރައިޓަނާ ދެކޮޅަށް ކުޅުނު މެޗުން ވެސް ބަލިވެ ޗެލްސީގެ ވަގުތީ ކޯޗު ފްރޭންކް ލަމްޕާޑަށް ޕްރެޝަރު ބޮޑުވެއްޖެ އެވެ.

ޗެލްސީގެ އަމިއްލަ ދަނޑުގައި ކުޅުނު މެޗުން އެ ޓީމު ބަލިވީ ފުރަތަމަ ލަނޑު ޖަހައި ކުރި ވެސް ހޯދާފައި ވަނިކޮށެވެ. ޗެލްސީން އެއް ލަނޑުގެ ލީޑެއް ނަގާފައި ވަނިކޮށް ބްރައިޓަން އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ. މިއީ ޗެލްސީގެ ކޯޗުކަމާ ދެ ވަނަ ފަހަރަށް ލަމްޕާޑު ހަވާލުވި ފަހުން އެ ޓީމުން ބަލިވި ތިން ވަނަ މެޗެވެ. ފުރަތަމަ މެޗުގައި ލީގުގައި ވަނީ ވުލްވްސް އަތުން ބަލިވެފަ އެވެ. ދެ ވަނަ މެޗުގައި ރެއާލް މެޑްރިޑު އަތުން ބަލިވީ ޔުއެފާ ޗެމްޕިއަންސް ލީގުގަ އެވެ.

މެޗު ފަށައިގެން 13 ވަނަ މިނެޓުގައި ޗެލްސީ އަށް ލީޑު ނަގައިދިނީ މިޑްފީލްޑަރު ކޮނާ ގަލަގާ އެވެ. އެއީ މިކައިލޯ މުދްރިކް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ފުރަތަމަ ހާފު ނިމުމުގެ ތިން މިނެޓު ކުރިން ބްރައިޓަނަށް ނަތީޖާ ހަމަހަމަކޮށްދިނީ ޑެނީލ ވެލްބެކް އެވެ. އެއީ ޕަސްކަލް ގްރޮސްގެ އެހީތެރިކަމާއެކު އޭނާ ޖަަހައިދިން ލަނޑެކެވެ. މެޗުން ބްރައިޓަން މޮޅުކޮށްދިން ލަނޑު 69 ވަނަ މިނެޓުގައި ސޮލީ މާޗް ތަނަވަސްކޮށްދިން ފުރުސަތެއްގައި ޖެހީ ޒުވާން ކުޅުންތެރިޔާ ޖޫލިއޯ އެންސިސޯ އެވެ.

ބައްޔާއެކު ޗެލްސީ އޮތީ މިހާތަނަށް ކުޅުނު 31 މެޗުން 39 ޕޮއިންޓާއެކު ތާވަލްގެ 11 ވަނައިގަ އެވެ. އެ ޓީމު އަތުން ހޯދި މޮޅާއެކު ބްރައިޓަން އޮތީ 29 މެޗުން 49 ޕޮއިންޓާއެކު ހަތް ވަނައިގަ އެވެ.