ސަރުކާރުގެ އިސްބޭބޭފުޅުންގެ " މޫނުމަތިން ޕްރެޝަރެއް ނެތްކަން" ފެންނާނެ ކަމަށް ފިޝަރީޒް މިނިސްޓަރ މުހައްމަދު ޝައިނީ ވިދާޅުވެއްޖެއެވެ.
ރައީސް އަބްދުﷲ ޔާމީނަށް ތާއީދު އޮތްކަން ހާމަކުރުމުގެ ގޮތުން ޒުވާނުންތަކެއް އިސްނަގައިގެން ކާނިވާ ސަރަހައްދުގައި ބުދަ ދުވަހު ބޭއްވި އެއްވުމެއް ގައި ބައިވެރިވެވަޑައިގެން ރާއްޖެޓީވީއަށް ދެއްވި އިންޓަވިއުއެއްގައި ޝައިނީ ވިދާޅުވީ މަސީހުގެ އިތުބާރު ނެތް ކަމަށް ހުށަހަޅާފައިވާ މައްސަލައާ ގުޅިގެން ސަރުކާރު އެއްގޮތަކަށްވެސް ޕްރެޝަރަށް ނުވެއްޓޭ ކަމަށެވެ.
ވަޒީރުންތަކެއް އިސްތިއުފާ ދޭން އުޅޭކަމުގެ އަޑުތަކެއް ފެތުރިފައިވާތީ އެކަމާއި ގުޅިގެން ސުވާލުކުރުމުން ޝައިނީ ވިދާޅުވީ، އިތުބާރުގެ މައްސަލަ ކާމިޔާބު ވިޔަސް އެއްވެސް ވަޒީރަކު ރައީސް ޔާމީންގެ އަރިހުން ދުރަށް ވަޑައިނުގަންނަވާނެ ކަމަށާއި ސަރުކާރު އޮތީ ވަރަށް ސާބިތުކަމާއި އެކީ ވަރަށް ބަދަހިކޮށްކަމަށެެވެ.
"އެއްގޮތަކަށްވެސް އަންޑަސްޓޭންޑެއް ނުވޭ މަޖިލީހުގައި ތި ނަގާ ނޯ ކޮންފިޑެންސް ވޯޓަކާއި ސަރުކާރާއި އޮތް ގުޅުމެއް" ޝައިނީ ވިދާޅވިއެވެ.
ޝައިނީ ވިދާޅުވީ، އެމްޑީޕީގެ ސަރުކާރުވެސް އޭރު އޮތީ މަޖިލީހުގެ މައިނޯރިޓީއަކާއި އެއްކޮށްކަމުން، ރައީސް ޔާމީންގެ މި ސަރުކާރު ވަކި ވެއްޓެންވީ އެއްވެސް ސަބަބެއް ނުވިސްްނޭ ކަމަށެވެ.
މަޖިލީހަށް މިހާރު ވައްދާފައިވާ މަސީހުގެ ނޯ ކޮންފިޑެންސް ވޯޓާއި ގުޅޭގޮތުން ވާހަކަފުޅު ދައްކަވަމުން ޝައިނީ ވިދާޅުވީ، އެ މައްސަލަ މަޖިލީހަށް ހުށަހަޅާފައިވަނީ މެންބަރުންނަށް ފައިސާ ދީގެން ކަމަށްވާތީ، އެކަމަށް ހަގީގީ ސަޕޯޓެއް ނުލިބޭނޭ ކަމަށެވެ.
"އިރާދު ކުރެއްވިއްޔާ ކުރިންވެސް ފެއިލްކޮށްލިގޮތަށް މިފަހަރުވެސް ފެއިލްކޮށްލާނަން" ޝައިނީ ވިދާޅުވިއެވެ.
ދަނގެތީ ދާއިރާގެ މެންބަރު އިލްހާމް އަހުމަދާއި، މައްޗަންގޮޅި ދެކުނު ދާއިރާގެ މެންބަރު އަބުދުﷲ ސިނާން މަސީހުގެ އިތުބާރު ނެތް ކަމަށް ހުށަހެޅި މައްސަލައިގައި ސޮއިކުރެއްވުމުން، އެބޭފުޅުން އޮޅުވާލެއްވީކަމަށް ވިދާޅުވެ ޝައިނީ ކުރެއްވި ޓްވީޓާއި ގުޅޭ ގޮތުން ސުވާލުކުރުމުން ވިދާޅުވީ، އިލްހާމާއި ސިނާންއާ އޭރުވެސް ދިޔައީ ވާހަކަ ދައްކަމުން ކަމަށާއި، އެބޭފުޅުން ހިތްހަމަ ނުޖެހޭ ކަންތައްތަކެއް ހުރި ކަމަށެވެ. އަދި އެބޭފުޅުން އޭރު ދެއްކެވި ވާހަކަ އާއި އަމަލުފުޅާއި ދިމާނުވިކަމަށެވެ. އެހެންވެެ އެއީ އެކަމާ ހިތްހަމަ ނުޖެހޭކަން ހާމަކުރުމުގެ ގޮތުން ކުރި ޓްވީޓެއްކަމަށް ޝައިނީ ވިދާޅުވި އެވެ.
މިނިސްޓަރ ޝައިނީ ވިދާޅުވީ، އިދިކޮޅު ފަރާތްތަކުން މިހާރު ކުރަމުންދާ މަސައްކަތުން ރައީސް ޔާމީންގެ ސަރުކާރުން ވައްޓާނުލެވޭނޭ ކަމަށެވެ.
