ސްޕެއިންގެ ބާސެލޯނާގެ ކުރީގެ ކެޕްޓަން ލިއޮނަލް މެސީ ހޯދުމަށް އެ ކުލަބުން "ގަދަ އަޅައި" މަސައްކަތްކުރަމުން އަންނަކަމަށް މީޑިއާ ރިޕޯޓުތައް ބުނެފިއެވެ.

ބާސެލޯނާ ދޫކޮށް މެސީ އޭނާގެ މިހާރުގެ ކުލަބް ޕެރިސް ސެއިންޓް ޖާމަން (ޕީއެސްޖީ)އަށް ބަދަލުވީ 2021 ވަނަ އަހަރު އެވެ. ދެ އަހަރު ދުވަހުގެ އެއްބަސްވުމެއްގެ ދަށުން މެސީ ޕީއެސްޖީއަށް ބަދަލުވިއިރު، އެ އެއްބަސްވުމުގެ މުއްދަތު މި އަހަރު ހަމަވާނެއެވެ. މެސީ ބާސެލޯނާ ދޫކޮށްލީ އެ ޓީމުގެ މާލީ ހާލަތު ގޯސްވެ، އޭނާގެ އެއްބަސްވުން އައުނުކުރެވުމުންނެވެ. އޭގެ ފަހުން މިހާރު ބާސެލޯނާގެ މާލީ ހާލަތު ރަނގަޅުވެފައިވާއިރު، ބާސެލޯނާގެ އިސްވެރިން އަންނަނީ ތަކުރާރުކޮށް މެސީގެ ވާހަކަ ދައްކަމުންނެވެ.

ދާދި ފަހުން ބާސެލޯނާގެ ނައިބު ރައީސް ރަފައެލް ޔޫސްޓޭ ވިދާޅުވީ، މެސީ އަލުން އަނބުރައި އެ ކުލަބަށް ގެންނަން މަސައްކަތްކުރާކަމަށެވެ. އޭނާ ވިދާޅުވީ ފާއިތުވި ދުވަސްތަކުގައި މެސީއާ ވާހަކަދެކެވިފައި ވާނެކަމަށާއި، ބާސެލޯނާއިން މެސީގެ އަގު ވަޒަންކުރާ މިންވަރު އޭނާއަށްވެސް އެނގޭނެ ކަމަށެވެ. މީގެ އިތުރުން ޔޫސްޓޭ ވިދާޅުވީ މެސީ އަލުން އަނބުރައި ބާސެލޯނާއަށް އައުމަކީ އޭނާ ވަރަށް ލޯބިކުރާނެ ކަމެއް ކަމަށެވެ. ޔޫސްޓޭ ވަނީ، މެސީ ބާސެލޯނާ ދޫކޮށް ދާންޖެހުނު ހިތްދަތި ދުވަސްތަކުގެ ވާހަކަވެސް ދައްކާފައެވެ. އޭނާ ބުނީ، މީގެ ދެ އަހަރު ކުރިން މެސީގެ އެއްބަސްވުން އައުކުރުމުގެ ވާހަކަ ދެއްކުމުގައި އޭނާވެސް ބައިވެރިވެފައި ވާނެކަމަށާއި، މެސީ ބާސެލޯނާ ދޫކޮށް ދާން ޖެހުން ވެގެން ދިޔައީ ވަރަށް ހިތްދަތި ކަމަކަށް ކަމަށެވެ. މީގެ އިތުރުން އޭނާ ބުނީ ބާސެލޯނާއާއި އެ ސިޓީދެކެ މެސީ ވަރަށް ލޯބިވާ ކަމަށާއި، ކުލަބުގެ އުންމީދަކީ ބާސެލޯނާގައި މެސީގެ ތާރީޚު ކުރިއަށް ގެންދިއުން ކަމަށެވެ.

މީގެ އިތުރުން ބާސެލޯނާގެ ކޯޗު ޒަވީ ހެނާންޑޭޒް ބުނީ، މެސީ އަލުން ބާސެލޯނާއަށް އައުމަކީ އޭނާވެސް ބޭނުންވާ ކަމެއް ކަމަށާއި، އެ ކަމުގައި މިހާރު މަސައްކަތްވެސް ކުރަމުން އަންނަ ކަމަށެވެ. ނަމަވެސް ޒަވީ ބުނީ އެއީ އޭނާގެ މައްޗަށް ބަރޯސާވާ ކަމެއް ނޫން ކަމަށެވެ. އޭނާ ބުނީ އެކަން ބިނާވެގެން ދާނީ މެސީ ހިތްހަމަޖެހޭ ގޮތަކަށް ކަމަށާއި، އަދި މެސީ އަލުން އަނބުރައި އަންނަން ބޭނުންވާނަމަ ކަމަށެވެ. އޭނާ ބުނީ މިއީ އެވާހަކަ ދައްކަން އެންމެ އެކަށީގެންވާ ވަގުތު ނޫންކަމަށާއި، ނަމަވެސް މެސީ ބާސެލޯނާއަށް އަތުވެއްޖެނަމަ އެންމެ ފުރަތަމަ އުފާވާނެ މީހަކީ އޭނާ ކަމަށެވެ. ޒަވީ ބުނީ ބާސެލޯނާގައި މެސީ ކުރިއަރަމުން އައި ގޮތާއި، ބާސެލޯނާގައި ކާމިޔާބީތައް ހޯދަމުން އައި ގޮތްވެސް ވަރަށް ރަނގަޅަށް އޭނާއަށް ފެނުނު ކަމަށެވެ. މެސީ އަލުން އައުމަކީ ބާސެލޯނާގެ ސަޕޯޓަރުންވެސް އެދޭ ކަމެއްކަން ފާހަގަކުރަމުން ޒަވީ ބުނީ، މެސީގެ ކެރިއަރުގެ ފަހު ދުވަސްތައް ބާސެލޯނާގައި ހޭދަކުރަންވެސް އެދޭ ކަމަށެވެ.

ބާސެލޯނާގައި މެސީ ވަނީ ގިނަ ކާމިޔާބީތަކެއްވެސް ހޯދާފައެވެ. އެ ކުލަބާއެކު އޭނާ ވަނީ 34 ތައްޓެއް ކާމިޔާބުކޮށްފައެވެ. މީގެ އިތުރުން، މެސީއަކީ ބާސެލޯނާގެ ތާރީޚުގައިވެސް އެ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ.