އައިޖީއެމްއެޗްގައި ގާއިމް ކުރެވިފައިވާ ކާޑިއެކް ސެންޓަރުން 1431 މީހަކަށް އެކި ފަރުވާތައް ދެވިފައިވާ ކަމަށް އައިޖީއެމްއެޗުން ބުނެފި އެވެ.

އައިޖީއެމްއެޗްގެ ޑިރެކްޓަރ، ޕަބްލިކް ރިލޭޝަންސް އެންޑް މީޑިއާ، އަހްމަދު މައުސޫމް ވިދާޅުވީ، ކާޑިއެކް ސެންޓަރުން ކޮންމެ ދުވަހަކު ވެސް ގިނަ  ބަޔަކަށް ފަރުވާ ދެމުންގެންދާ ކަމަށެވެ. އެގޮތުން 794 އެންޖިއޮގްރަފީ ހެދިފައިވާ އިރު 549 އެންޖިއޮޕްލާސްޓީ ހެދިފައިވާ ކަމަށް އެ ސެންޓަރުން މައުލޫމާތުދެ އެވެ.

ރާއްޖެޓީވީގެ "ޚަބަރުފީތާ" ޕްރޮގްރާމްގައި ވާހަކަދައްކަވަމުން، މައުސޫމް ވިދާޅުވީ، އައިޖީއެމްއެޗުން ތައާރަފް ކުރި މި ހިދުމަތުގެ ތެރެއިން ރާއްޖޭގައި ހިތުގެ ބަލި އިތުރުވެފައިވާ މިންވަރު ފާހަކުރެވި، ހާއްސަކޮށް ޒުވާން އުމުރުގައި ހިތުގެ ތަފާތު ބަލިތަކާ ކުރިމަތިލާންޖެހޭ މީހުން ކަންބޮޑުވާ މިންވަރަށް އިތުރުވެފައިވާކަން ފާހަގަކުރެވިފައިވާ ކަމަށެވެ.

" މި ކާޑިއެކް ސެންޓަރުގައި ސަރަހައްދީ ފެންވަރުގެ ފަރުވާތަކެއް ވެސް މިދިޔަ އެއް އަަހަރު ދުވަހުގެ ތެރޭގައި ކާމިޔާބު ކަމާ އެކު ވަނީ ދެވިފަ. ހަތަރު ކޮމްޕްލިކޭޓެޑް ޕްރޮސިޖަރތަކެއް ވެސް އަޅުގަނޑުމެންގެ ނޭޝަނަލް ކާޑިއެކް ސެންޓަރުން ވެސް ވަނީ ހަދާފަ. މި ހަތަރު ޕޭޝަންޓުންނަކީ މި ސަރަހައްދުގެ އެހެން ގައުމުގެ ހޮސްޕިޓަލުތަކުގައި ވެސް ފަރުވާ ހޯދަން ގޮސްފައި އެއްކޮށް ފުރިހަމަ ނުކުރެވި، ރިސްކު ބޮޑުކަމުން ޕްރޮސީޖާތައް ނުހެދި ތިބި ހަތަރު ޕޭޝަންޓުން،" މައުސޫމް ވިދާޅުވި އެވެ.

އިންޑިޔާގެ މެޓްރީނާ ހޮސްޕިޓަލުގެ ކާޑިއޮލިޖިސްޓުންގެ އެހީތެރިކަމާ އެކު ނޭޝަނަލް ކާޑިއެކް ސެންޓަރުގެ ހިދުމަތް ދެމުންގެންދާ އިރު އެ ސެންޓަރުންދޭ ހިދުމަތްތަކީ ބަލި މީހުން ވެސް ބަލައިގަންނަ ސިއްހީ ހިދުމަތްތަކެއްކަން ފާހަގަކުރެވިފައިވާ ކަމަށް މައުސޫމް ވިދާޅުވި އެވެ

އެގޮތުން މި ސަރަހައްދުގެ ހޮސްޕިޓަލުތަކުން ލިބޭ ހިދުމަތަކަށް ވުރެ ރާއްޖޭގެ ކާޑިއެކް ސެންޓަރުން މާ ފަސޭހަކަމާއި އިތުބާރާ އެކު ހިދުމަތް ލިބޭ ކަމަށް ގިނަ ބަޔަކު ގަބޫލު ކުރަމުންދާ ކަމަށް އައިޖީއެމްއެޗުން ބުނެ އެވެ.

"ރާއްޖެއަށް ޗުއްޓީ ހޭދަކުރުމަށް އަންނަ ޓޫރިސްޓް ފަރާތްތަކުން ވެސް ސިއްހީ އެމަރޖެންސީސްތައް ދިމާވެގެން އަޅުގަނޑުމެންގެ ކާޑިއެކް ސެންޓަރުން ހިދުމަތް ހޯދާފަ. މިދެންނެވި ފަރާތްތަކުން ބައެއް ފަހަރު އެބޭފުޅުންގެ ޑޮކްޓަރުންނާއި މަޝްވަރާ ކުރުމަށް ފަހު ރާއްޖޭގެ ކާޑިއެކް ސެންޓަރުން ހިދުމަތް ހޯދުމަށް އެންމެ ރަނގަޅު ކަމަށް ވަނީ ރެކޮމެންޓްކޮށްފައި،" މައުސޫމް ވިދާޅުވި އެވެ.

މައުސޫމް ވިދާޅުވީ، ސަރަހައްދީ އެންމެ ފެންވަރު ރަގަޅު ކާޑިއެކް ސެންޓަރުތަކުން ދެވޭ ހިދުމަތްތައް އައިޖީއެމްއެޗުގެ ކާޑިއެކް ސެންޓަރުން މިހާރު ދެވޭ ކަމަށެވެ.

ކާޑިއެކް ސެންޓަރު ގާއިމް ކުރުމުގެ ކުރިން ދުވާލަކު ފަސް މީހުން އެވްރެޖްކޮށް އެންޖިއޯގްރާމް ހެދުމަށް ރާއްޖެއިން ބޭރަށް ފޮނުވަންޖެހޭ ކަމަށް މައުސޫމް ވިދާޅުވިއެވެ. މިއީ ހިތުގައި ބްލޮކެއް އުޅޭތޯ ބެލުމަށް ހަދާ ޓެސްޓް ކަމަށްވާ އިރު، މިހިދުމަތް ރާއްޖެއިން ލިބިގެންދިއުމަކީ ވަަރަށް ގިނަ ފައިސާ ދައުލަތަށް ރައްކާކުރެވޭނެ ކަމެއް ކަމަށް އޭނާ ވިދާޅުވި އެވެ.

މައުސޫމް ވިދާޅުވީ، ކާޑިއެކް ސެންޓަރު ހުޅުވުނު ހިސާބުން ވެސް އައިޖީއެމްއެޗުން އަމާޒް ހިފާފައި ވަނީ އޯޕަން ހާޓް ސަރޖެރީ ހެދުމާ ހަމައަށް ހިދުމަތް ފުޅާ ކުރުމަށް ކަމަށާއި އައިޖީއެމްއެޗުގެ އަލަށް ތަަރައްގީ ކުރާ 25 ބުރީގެ އާ އިމާރާތާ އެކު ރާއްޖޭގައި އޯޕަން ހާޓް ސަރޖެރީ ހެދިގެންދާނެ ކަމަށެވެ.

ނޭޝަނަލް ޑައިގްނޯސްޓިކް ސެންޓަރު ހުޅުވިގެންދާ އިރު އެ އިމާރާތައް ކާޑިއެކް ސެންޓަރ ބަދަލުވާނެ ކަަމަށެވެ. އަދި އެތަނުގައި ގާއިމް ކުރެވޭ ކާޑިއެކް ސެންޓަރުގައި ދެ ކެތު ލެބުން ހިދުމަތް ލިބިގެންދާނެ ކަން މައުސޫމް ފާހަަގަކުރެއްވި އެވެ.  އަދި 2018 ވަނަ އަހަރުގައި މިކަން ހާސިލް ކުރެވޭނެ ކަމުގެ އުންމީދު އެބަ އޮތް ކަަމަށް މައުސޫމު ވިދާޅުވި އެވެ.

 އައިޖީއެމްއެޗުގައި ނޭޝަނަލް ކާޑިއެކް ސެންޓަރު ހުޅުވާފައި ވަނީ މިދިޔަ އަހަރުގެ ޖޫން 5 ގައެވެ.