ގަތަރާ ގުޅުން ކަނޑާލާފައިވާ އަރަބި ގައުމުތަކާ މަޝްވަރާ ކުރުމަށް ތައްޔާރު ކަމަށް އެގައުމުން ބުނެފިއެވެ.

ގަތަރުން މިހެން ބުނިއިރު އަރަބި ބައެއް ގައުމުތަކުން ގަތަރަށް ކޮށްފައިވާ ޑިމާންޑްތަކަށް އަމަލު ކުރުމުގެ ސުންގަނޑި ވަނީ އަންގާރަ ދުވަހުގެ މެންދަމަށް (5 ޖުލައި) ހަމަވެފައެވެ. 

ބުދަ ދުވަހު ޑިމާންޑްތައް ކޮށްފައިވާ އަރަބި ގައުމުތަކުން ބުނެފައި ވަނީ ޑިމާންޑްތަކާ ބެހޭ ގޮތުން ގަތަރުގެ ޖަވާބު ލިބިއްޖެ ކަމަށާއި ރަނގަޅު ވަގުތުގައި އެކަމަށް އެ ގައުމުތަކުގެ ޖަވާބު ލިބޭނެ ކަމަށެވެ.

ޖުލައި 5 އަށް ސުންގަނޑި ހަމަވިއިރު، އެއީ އިތުރު ކުރުމަށް ފަހު ކަނޑައަޅާފައިވާ އާ ސުންގަނޑިއެވެ. 

އެންމެ ފުރަތަމަ، ސައުދީ އަރަބިއްޔާ، ބަހްރޭން، ޔޫއޭއީ އަދި މިސްރުން ބުނެފައި ވަނީ 13 ޝަރުތު ގަތަރުން 10 ދުވަހުގެ ތެރޭގައި ފުރިހަމަ ކުރުމުން ނޫނީ އިގްތިސާދީ ގޮތުންނާއި ޑިޕްލޮމެޓިކް ގޮތުން ގަތަރަށް ކުރިމަތި ކޮށްފައިވާ ފިއްތުންތައް ނައްތާނުލާނެ ކަމަށެވެ. އޭގެ ފަހުން ގަތަރަށް ވަނީ ޑިމާންޑްތަކަށް އަމަލު ކުރުމަށް 48 ގަނޑިއިރުގެ މުހުލަތެއް ދީފައެވެ. 

ގަލްފުގެ ގައުމުތަކުން ގަތަރަށް ކޮށްފައިވާ ޑިމާންޑްތަކުގެ ތެރޭގައި ހިމެނެނީ އިރާނާއެކު ޤަތަރުން ބާއްވާ ސިޔާސީ ގުޅުން ހަނިކޮށް، ޤަތަރުގައި ހުރި އިރާނުގެ ޑިޕްލޮމެޓިކް މިޝަން ބަންދުކުރުމާއި، ގަތަރުގައި ތިބި އިރާނުގެ ރިވޮލޫޝަނަރީ ގާޑުގެ ސިފައިން ޤަތަރުން ބޭރުކޮށް، އިރާނާއެކު އޮންނަ އަސްކަރީ ގުޅުން ކަނޑާލުމާއި، ގަތަރުގައި ތުރުކީން ބިނާކުރާ އަސްކަރީ ބޭސްގެ މަސައްކަތް ވަގުތުން ހުއްޓުވުމާއި އަސްކަރީ ގޮތުން ތުރުކީއާ އޮންނަ ގުޅުން ކަނޑާލުން އަދި ދުނިޔޭގެ އެންމެ މަޝްހޫރުއެއް ނޫސް އިދާރާ ކަމަށްވާ ގަތަރުގެ އަލްޖަޒީރާ ބަންދުކުުރުން ފަދަ ކަންކަމެވެ.