މިހާރު އޮތް ޕްލޭނާއެކު ކުރިއަށް ގޮސްފިނަމަ، ދުނިޔޭގެ ހަތަރު ވަނަ ނުވަތަ ފަސް ވަނަ އަށް ސައުދީ ޕްރޯ ލީގު ޖެހިލާނެ ކަމަށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.

ސައުދީ ލީގުގެ އަލް ނަސްރަށް ކުޅެމުން އަންނަ ރޮނާލްޑޯ މިހެން ބުނީ އެ ލީގާ ގުޅޭ ގޮތުން ވާހަކަ ދައްކަމުންނެވެ. އިނގިރޭސި ޕްރިމިއާ ލީގުގެ މެންޗެސްޓަރ ޔުނައިޓެޑުގެ އިސް ވެރިންނާއި، ކޯޗާ ޖެހުނު މައްސަލައެއްގައި ރޮނާލްޑޯ އެ ޓީމު ދޫކޮށް އަލް ނަސްރަށް ބަދަލުވީ މިދިޔަ އަހަރުގެ ޑިސެމްބަރު މަހު އެވެ. މިހާތަނަށް ރޮނާލްޑޯ އަންނަނީ އަލް ނަސްރާއެކު މޮޅު ކުޅުމެއް ދައްކަމުންނެވެ. އެކުލަބަށް މިހާތަނަށް ކުޅެދިން 10 މެޗުން ރޮނާލްޑޯ ވަނީ ނުވަ ލަނޑު ޖަހައިފަ އެވެ. ސައުދީ ލީގާ ގުޅޭ ގޮތުން ވާހަކަ ދައްކަމުން ރޮނާލްޑޯ ބުނީ، އެ ލީގަކީ ވަރަށް ވާދަވެރި ލީގެއް ކަމަށެވެ. މީގެ އިތުރުން އެއްވެސް ވަރަކަށް ދޮގު ހަދަން ބޭނުންނުވާކަން ފާހަގަކުރަމުން އޭނާ ބުނީ، ސައުދީ ލީގާއި ޕްރިމިއާ ލީގާ އެއްވަރު ނުވާނެ ކަމަށެވެ. ނަމަވެސް ސައުދީ ލީގަކީ ބަދަލުވުމާއެކު އޭނާ އަށް ހައިރާންކަމެއް ލިބުނު ލީގެއް ކަމަށް ވެސް ރޮނާލްޑޯ ބުންޏެވެ.

އިތުރަށް ވާހަކަ ދައްކަމުން ރޮނާލްޑޯ ބުނީ، ސައުދީ ލީގުން މިހާރު ހަދާފައިވާ ޕްލޭންތަކާއެކު އެމީހުން ކުރިއަށް ގޮސްފި ނަމަ، ކުރިއަށް އޮތް ފަހެއް، ހައެއް ނުވަތަ ހަތް ވަރަކަށް އަހަރުގެ ތެރޭގައި އެ ލީގު ދުނިޔޭގެ ހަތަރެއް ނުވަތަ ފަސް ވަނަ އަށް ޖެހިލާނެ ކަމަށެވެ. އަދި އޭނާ ކެރިއަރުގެ ނުބައި މަރުހަލާއެއް ކަޑަތުކޮށްފައިވާ ކަމަށާއި، އެކަމާ އެއްވެސް މައްސަލައެއް ޖައްސަން ބޭނުންނުވާ ކަމަށެވެ. ނަމަވެސް ދިރިއުޅުމައިގެން ކުރިއަށް ދާން ޖެހޭނެކަން ފާހަގަކުރަމުން ރޮނާލްޑޯ ބުނީ، އެންމެ އުނދަގޫ ވަގުތުގައި ވެސް އެކުގައި ތިބޭ ގާތް ރަހުމަތްތެރިންނަކީ ކޮބައިކަން އޭނާ އަށް އެނގޭ ކަމަށެވެ.

ރޮނާލްޑޯ އެ ކުލަބަށް ގުޅުނީ ފުޓުބޯޅައިގެ ތާރީޚުގައި ވެސް އެންމެ ބޮޑު މުސާރަ ލިބޭ ކުޅުންތެރިޔާގެ ގޮތުގައި ކަމަށް ރިޕޯޓުތައް ބުނެ އެވެ. ރިޕޯޓުތައް ބުނާ ގޮތުން ރޮނާލްޑޯ އަށް އަހަރަކު މުސާރައިގެ ގޮތުގައި 214 މިލިއަން ޑޮލަރަށްވުރެ ބޮޑު އަދަދެއް ލިބޭނެ އެވެ.