އުތުރު ކޮރެއާ އިން މެދު ރާސްތާގެ ބެލިސްޓިކް މިސައިލެއް ޖަޕާނުގެ ކަނޑުގެ ސަރަހައްދަށް ފޮނުވާލާފައިވާ ކަމަށް އެމެރިކާގެ އަސްކަރީ އޮފިޝަލުން ބުނެފިއެވެ.
ރިޕޯޓްތައް ބުނާގޮތުން އުތުރު ކޮރެއާ އިން މި ބެލިސްޓިކް މިސައިލް ފޮނުވާލީ ޕެންހިއޮން ވައިގެ ސަރަހައްދުންނެވެ. އެމެރިކާ ޕެސިފިކް ކޮމާންޑުން ބުނީ އުތުރު ކޮރެއާ އިން އުދުއްސާލި މިސައިލް 37 މިނިޓަށް އުދުހުމަށްފަހު ވެއްޓިފައި ވަނީ ޖަޕާނު ކަނޑަށް ކަމަށެވެ.
އުތުރު ކޮރެއާ އިން ފޮނުވާލި މިސައިލް ޖަޕާނު ކަނޑަށް ވެއްޓުމާއި ގުޅިގެން ޖަޕާނުން ވަނީ ވަރަށް ހިތްހަމަ ނުޖެހިފައެވެ. އެގޮތުން ޖަޕާނުގެ ބޮޑު ވަޒީރު ޝިންޒޯ އަބޭ ވިދާޅުވީ އުުުތުރު ކޮރެއާ އިން އުުދުއްސާލި މިސައިލުން " ސީދާ އެނގިގެން ދަނީ ބިރުވެރިކަން ބޮޑުވެފައިވާ" ކަން ކަމަށެވެ.
އުތުރު ކޮރެއާގެ އެންމެ ފަހުގެ ބެލިސްޓިކް މިސައިލް އުދުއްސާލުމާއި ބެހޭގޮތުން، ޖަޕާނުގެ އޮފިޝަލުން ވިދާުޅުވެފައި ވަނީ މިސައިލް ވެއްޓިފައި ވަނި އެގައުމުގެ އެކްސްކްލޫސިވް އިކޮނޮމިކް ޒޯން އަށް ކަމަށެވެ.
އަންގާރަ ދުވަހު އުތުރު ކޮރެއާ އިން އުދުއްސާލި މެދު ރާސްތާގެ ބެލިސްޓިކް މިސައިލާއި ބެހޭގޮތުން އެމެރިކާ އިން ބުނެފައި ވަނީ އެ މިސައިލްގެ ސަބަބުން އުތުރު އެމެރިކާ ސަރަހައްދަށް ގެއްލުމެއް ނުފޯރާ ކަމަށެވެ.
އުތުރު ކޮރެއާ އިން ދަނީ ތަކުރާރުކޮށް މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތައް ހިންގަމުންނެވެ. އެކަމުގެ ސަބަބުން ދެކޮރެއާ ސަރަހައްދު ވަނީ ހަލަބޮލިވެފައެވެ. އަދި އެމެރިކާ އާއި އުތުރު ކޮރެއާގެ ގުޅުން ވެސް ވަނީ ވަރަށް ގޯސްވެފައެވެ. އުތުރު ކޮރެއާ އިން ކުރާ މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތަކާއި ގުޅިގެން އދ އިން ދާދިފަހުން ވަނީ އުުތުރު ކޮރެއާ އާ ދެކޮޅަށް އާ ދަތިކުުރުމުގެ ފިޔަވަޅުތަކެއްް ވެސް އަޅާފައެވެ.
