ޖަލަށްލާފައި ހުންނެވި ކުރީގެ ނައިބު ރައީސް އަހުމަދު އަދީބު އަވަހާރަކޮށްލުމަށް ރާވާ ކަމުގެ މައުލޫމާތު ލިބުމުން އެކަން ފުލުހުންގެ ސަމާލުކަމަށް އެދިފައިވާނެ ކަމަށް އޭނާގެ ގާނޫނީ ވަކީލު މަހުފޫޒު ސައީދު ވިދާޅުވެއްޖެއެވެ.
މަހުފޫޒު ސައީދު ހޯމަދުވަހު ކުރެއްވި ޓްވީޓެއްގައި ވިދާޅުވީ އަދީބު އަވަހާރަކޮށްލަން ރާވާ ކަމުގެ މައުލޫމާތު ލިބުމާ އެކު ފުލުހުންގެ ސަމާލުކަށް ގެނެސް އަވަސް ފިޔަވަޅަކަށް އެދި ސިޓީއަކުން ހުށަހަޅުއްވާފައިވާ ކަމަށެވެ.
މަހުފޫޒުގެ އެޓްވީޓާ އެކު ވަނީ ކަމިޝަނަރ އޮފް ޕޮލިސް އަހުމަދު އަރީފަށް އެޑްރެސްކޮށް ފޮނުއްވި ސިޓީ އެޓޭޗްކުރައްވާފައެވެ.
އެސިޓީގައި ވިދާޅުވެފައިވަނީ މުވައްކިލު އަހުމަދު އަދީބު އަބްދުލްޣަފޫރު ދޫނިދޫ ގޮޅީގައި އޮއްވާ އަވަހާރަކޮށްލުމަށް ރޭވުންތަކެއް ކުރިއަށްދާ ކަމުގެ މައުލޫމާތު ލިބިފައިވާ ކަމަށެވެ.
އެހެންކަމުން މިކަމަށް ޚާއްސަ ސަމާލުކަމެއް ދެއްވާ، މިމައްސަލަ ތަހުގީގު ކޮށްދެއްވުން އެދެމެވެ. އަދި މިފަދަ ކަމެއް މެދުވެރިވިޔަ ނުދިނުމަށް އަޅަންޖެހޭ ފިޔަވަޅުތައް އަޅުއްވައި ދެއްވުން އެދިލައްވާ ކަމަށް ކަމިޝަނަރ އޮފް ޕޮލިސް އަށް އެޑްރެސް ކުރައްވާ މަހުފޫޒު ހުށައެޅުއްވި ސިޓީގައި ވިދާޅުވެފައި ވެއެވެ.
Kureege VP Adeeb maraalan raavaa kamuge mauloomaathu libumun ekan fuluhunge samaalukamah genes avas fiyavalhakah edhi sitee laifin. pic.twitter.com/jT8b2Mbjcf
— Mahfooz Saeed (@MahfuzSayd) July 3, 2017
އަދީބު އަވަހާރަކޮށްލަން އުޅޭކަމުގެ މައުލޫމާތު ލިބިފައިވާ ކަމަށް މަހުފޫޒު ވިދާޅުވެފައިވާއިރު ގަލޮޅު ދެކުނު ދާއިރާގެ މެމްބަރު އަހުމަދު މަޙްލޫފު ވެސް ވިދާޅުވެފައިވަނީ އަދީބު ދޫނިދޫގައި ބާއްވާފައި އޮންނަ ނިކަމެތި ހާލު ފެންނަން އޮތް ކަމަށާއި އަދީބު އަވަހާރަކޮށްލަފާނެ ކަމާ މެދު ކަންބޮޑުވެވަޑައިގަންނަވާ ކަމަށެވެ.
އަދީބު ޖަލުގައި ބަހައްޓައިގެން ޒަހަރު ކަހަލަ އެއްޗެއް ދީގެން ސިއްހީ ހާލަތު ގޯސްކޮށް މަރާލަފާނެކަމުގެ ކަންބޮޑުވުން އެބަ އޮތްކަމަށް މަހުލޫފު ވަނީ މީގެ ކުރިން ވިދާޅުވެފައެވެ. އަދީބު ދަނީ 33 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. މަހްލޫފް ވަނީ އަދީބު ޖަލުގައި އޮންނެވި މަންޒަރު ދައްކުވައިދޭ ފޮޓޯއެއް ވެސް ސޯޝަލް މީޑިއާގައި އާންމުކުރައްވާފައެވެ.
އަދީބުގެ ވަކީލުން ވެސް ވިދާޅުވެފައި ވަނީ ޖަލުގައި އޮންނަވަނިކޮށް އަދީބު އަވަހާރަވެދާނެ ކަމަށާއި ފަރުވާ ބޭނުންވާ ކަމަށެވެ. އަދީބަށް ސިއްހީ ގިނަ މައްސަލަތަކެއް ކުރިމަތިވެ ބޭސްފަރުވާ އަށް ގައުމުން ބޭރަށް ވަޑައިގަތުމުގެ ހުއްދަ ދިނުމަށް ވަނީ އެދިފައެވެ. ނަމަވެސް ސަރުކާރުން ދަނީ އެކަމަށް ދެކޮޅު ހަދަމުންނެވެ.
