ނާކާމިޔާބުވުމަކީ އިރުކޮޅުކޮޅާ ގޮތް ބަދަލުކުރަން ޖެހޭ ކަމެއް ނޫން ކަމަށް, އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ހޮނިހިރު ދުވަހު އިމްރާން ކުރެއްވި ޓްވީޓެއްގައި ވިދާޅުވީ, ސިޔާސީ މަސައްކަތުގައި އިހުލާސްތެރި ހިތަކައިގެން އެއްގޮތެއްގައި ދިގު މުއްދަތަކަށް ދެމިހުރެގެން މެނުވީ ހެޔޮ ނަތީޖާއެއް ނުނެރެވޭނެކަން ވަރަށް ސާފުކޮށް ފެންނަމުންދާކަމަށެވެ. އަދި ނާކާމިޔާބީއަކީ އިރުއިރުކޮޅާ ގޮތް ބަދަލުކުރަންޖެހޭ ކަމެއް ނޫންކަމަށް ވެސް އޭނާ ވިދާޅުވިއެވެ.
އިމްރާންގެ މި ބަސްފުޅުތައް އަމާޒުވަނީ، އެމްޑީޕީގެ ރިޔާސީ އިންތިހާބުގައި ނާކާމިޔާބުވެވަޑައިގަތް، އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ކަމަށް ބެލެވެއެވެ. ޕްރައިމަރީގައި ނާކާމިޔާބުވެވަޑައިގަތުމުން އެމަނިކުފާނު ގެންދަވަނީ "ފިކުރެއްގެ ދިރުން" ނަމުގައި އެމްޑީޕީގައި ގޮތްޕެއް ހެއްދެވުމުގެ މަސައްކަތްޕުޅު ކުރަމުންނެވެ.
އިމްރާން މީގެ ތިން ދުވަަސް ކުރިން ކުރެއްވި ޓްވީޓެއްގައި ވިދާޅުވީ، ޓީމުގެ ކުޅުންތެރިއެއްގެ ގޮތުގައި ކުޅެ، ލަނޑުޖަހަން ނޭނގޭ މީހަކަށް ޓީމްގެ ކެޕްޓަނަކަށްވެ، ކުޅުންތެރިން ލައްވައި ލަނޑެއް ނުޖެއްސުވޭނެ ކަމަށެވެ.
އިމްރާން މި މޭރުމުން ވާހަކަފުޅު ދައްކަވާފައިވާއިރު، އެމްޑީޕީގެ ރިޔާސީ ކެނޑިޑޭޓް ރައީސް އިބްރާހީމް މުހައްމަދު ސާލިހާއެކު މި އަހަރުގެ ރިޔާސީ އިންތިހާބަށް ކޯލިޝަން ހަދަން އެންމެ ފުރަތަމަ ނިންމީ އަދާލަތު ޕާޓީންނެވެ.
