މި ސަރުކާރުން މަސައްކަތްކުރަނީ ރައްޔިތުންނަށް ހަމަޖެހިލައިގެން އުޅެވޭނެ މާހައުލެއް ގާއިމްކޮށްދިނުމަށް ކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވެއްޖެއެވެ.
ސައީދު މިފަދައިން ވިދާޅުވީ ތ. ހިރިލަންދޫ ފެނަކަ އައު އޮފީސް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. އޭނާ ވިދާޅުވީ ދަތި އުނދަގުލާއި ދުއްތުރާތަކުގައިވެސް މަސައްކަތްތައް ކުރިއަށްގެންދަވާއިރު، މިކުރެވެނީ ކޮން ކަމެއްބާއޭ ހިތަށް އަރާވަޑައިގަންނަވާ ކަމަށެވެ.
އެހެންނަަމަވެސް މި ހުރިހާ ކަމެއްގެ ތެރެއިން ރައީސުލްޖުމްހޫރިއްޔާ އަބަދުވެސް ވިދާޅުވާ ބަސްކޮޅެއްގެ ސަބަބުން ހިތްހަމަޖެހުން ގެނުވާކަމަށް ސައީދު ވިދާޅުވިއެވެ.
ތިމަންމަނިކުފާނު ބޭނުންފުޅުވަނީ ރާއްޖޭގެ ރައްޔިތުންނަށް އުފާވެރިކަމާއި ހިތްހަމަޖެހުމާއި، ހަމަޖެހިލައިގެން އުޅެވޭ މާހައުލެއް އޮތުމޭ. އެމަގުނަ މަސައްކަތްކޮށްދިނުމަކީ ތިމަންމަނިކުފާނު ވަރަށް ބޮޑަށް އެދޭ ކަމެކޭފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު
ސައީދު ވިދާޅުވީ ދިވެހިން މީގެ ކުރިން އުޅުނު ދަތި ހާލަތު މާޒީވެ ދާހެން މިހާރު ހީވަމުންދާކަމަށެވެ. ރައީސް ސާލިހު މިއަދު ރާއްޖޭގެ ރައްޔިތުންނަށް ދައްކަވަމުންގެންދަވަނީ މުޅިން އައު ރަން ޒަމާނެއް ކަމަށާއި، މި ސަރުކާރުގެ މައިގަނޑު މަސައްކަތަކީ ދިވެހި ރައްޔިތުންނަށް ހިތްހަމަޖެހުމާއި އުފާ ފާގަތިކަން ހޯދައިދިނުންކަން ސައީދު ފާހަގަކުރެއްވިއެވެ.
