ޖުމްހޫރީ ޕާޓީގެ އަސާސީ ގަވާއިދަށް ހުށަހެޅި ތިން އިސްލާހު ޕާޓީގެ ޤައުމީ ކޮންފަރެންސްގެ އިއްތިފާގުން ފާސްކޮށްފިއެވެ.
ޖުމްހޫރީ ޕާޓީގެ ޤައުމީ ކޮންފަރެންސް ހުކުރު ދުވަހު ފަށާފައިވާއިރު މިކޮންފަރެންސް އިފްތިތާހުކޮށްދެއްވީ އެ ޕާޓީގެ ލީޑަރު ޤާސިމް އިބްރާހިމްއެވެ. މިޖަލްސާގައި ސިޔާސީ އެކި ޕާޓީތަކުގެ އިސްބޭފުޅުންނާއި، ރާއްޖޭގައި ތިއްބަވާ އެކި ޤައުމުތަކުގެ ސަފީރުންނާއި، އިލެކްޝަންސް ކޮމިޝަންގެ އިސްބޭފުޅުން ވެސް ބައިވެރިވެ ވަޑައިގެންނެވިއެވެ.
އެގޮތުން ޕާޓީގެ ކޮންފަރެންސް އިން ފާސްވެފައިވާ އިސްލާހުތަކަކީ މެންބަރުންގެ ހައްޤުތައް ވަގުތީ ގޮތުން ހިފެހެއްޓުމެވެ. މި އިސްލާހުގައި ވަނީ މެންބަރުގެ މެންބަރުކަމުގެ ހައްޤެއް ނުވަތަ ހައްޤުތައް ނުހިފަހައްޓާ ޕާޓީގެ މަޤްސަދު ހާސިލުކުރެވިދާނެތޯ ނުވަތަ ޕާޓީގެ މަސްލަހަތު ހިފެހެއްޓިދާނެތޯ ސުވާލު އުފެއްދުމެވެ. އަނެއް އިސްލާހަކީ ޕާޓީގެ ލީޑަރުގެ ސްޕެޝަލް އެޑްވައިޒަނުންނާއި ލީޑަރުގެ އެޑްވައިޒަރުންނާއި ލީޑަރުގެ 5 އެޑްވައިޒަރުން ތިބެންވާނެ ކަމަށެވެ. އަދި ޕާޓީގެ އެޑްވައިޒަރުންގެ ތެރޭގައި ހިމެނެން ޖެހޭ މީހުންނާއި ޕާޓީ ހިންގުމުގައި އަދި ސިޔާސީ ކަންކަމުގައި ޕާޓީގެ ލީޑަރަށް އިރުޝާދާއި ލަފަޔާއި އެހީތެރިކަން ދޭންވާނެ ކަމަށް ވެސް ވަނީ ބުނެފައެވެ. މީގެއިތުރުން ޕާޓީގެ ކައުންސިލް އެކުލެވިގެންވާ ގޮތް ކަނޑައެޅުމަށް ވެސް ހުށަހެޅި އިސްލާހު ވަނީ ފާސްވެފައެވެ.
ޖުމްހޫރީ ޕާޓީގެ ޤައުމީ ކޮންގްރެސްގައި އެޕާޓީން ކުރިއަށް އޮތް ރިޔާސީ އިންތިޚާބުގައި ނިންމާނެ ގޮތަކާއި ގުޅޭގޮތުން ހުށަހެޅިފައިވާ ޤަރާރަށް ބަހުސްކޮށް ވޯޓަށް އެހުމަށް ވެސް ހަމަޖެހިފައިވެއެވެ. އަދި ހޮނިހިރު ދުވަހުގެ ރޭ ޤައުމީ ކޮންފަރެންސް ނިންމުމުގެ ޖަލްސާ ބޭއްވުމަށް ވަނީ ހަމަޖެހިފައެވެ.
