ޔުވެންޓަސް އަށް ކުޅެމުން އަންނަ ފްރާންސް ޕައުލް ޕޮގްބާ އަދިވެސް އަނިޔާއިން ރަނގަޅު ނުވާ ކަމަށް އެ ޓީމުގެ ކޯޗު މާސިމިލިއާނޯ އަލެގްރީ ބުނެފި އެވެ.
މެންޗެސްޓަރ ޔުނައިޓެޑު ދޫކޮށް ޔުވެންޓަސް އަށް ބަދަލުވި ފަހުން ޕޮގްބާ އަށް ރަސްމީ މެޗެއް ކުޅުމުގެ ފުރުސަތު އަދި ނުލިބެ އެވެ. ޔުވެންޓަސް އަށް ބަދަލުވެ އައު ސީޒަނަށް ތައްޔާރުވުމުގެ ގޮތުން ކުރިއަށް ގެންދިޔަ ފަރިތަކުރުމެއްގެ ތެރެއިން ޕޮގްބާ އަށް ވަނީ އަނިޔާވެފަ އެވެ. އޭގެ ސަބަބުން ކުޅުމާ ދުރުގައި އޭނާ ހުންނަންޖެހުނު އިރު، ކަކުލުގެ އޮޕަރޭޝަނެއް ވެސް ވަނީ ކޮށްފަ އެވެ. އަނިޔާއާއެކު ޕޮގްބާ އަށް ވަނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތް ވެސް ގެއްލިފަ އެވެ. މިދިޔަ އަހަރުގެ ސެޕްޓެމްބަރު މަހުގެ ތެރޭގައި ޕޮގްބާ ކަކުލުގެ އޮޕަރޭޝަނެއް ކުރިއިރު، މިދިޔަ ޖެނުއަރީ މަހު އޭނާ ވަނީ ޔުވެންޓަސްގެ ފަރިތަކުރުންތަކުގައި ބައިވެރިވާން ފަށައިފަ އެވެ.
ޔުވެންޓަސްގެ ކޯޗު އަލެގްރީ ބުނީ، ޕޮގްބާ އަށް އަދިވެސް ކުޅެވޭ ވަރު ނުވާ ކަމަށާއި، އޭނާ ޓީމުގައި ހިމެނެން ނެތް ކަމަށެވެ. އަަދި އެއީ އެކަން މިހާތަނަށް އޮތް ގޮތް ކަމަށާއި، ހަގީގަތަށް ވާހަކަ ދައްން ޖެހޭނެ ކަމަށެވެ. އޭނާ ބުނީ ޕޮގްބާ އަދިވެސް ހުރީ އަނިޔާގައި ކަމަށާއި، އޭނާ އަށް އެނބުރި އާދެވޭނެ ތާރީޚެއް ވެސް ބުނަން ނޭންގޭ ކަމަށެވެ. ނަމަވެސް އޭނާ އިންތިޒާރު ކުރަމުން އަންނަނީ ޕޮގްބާ އެނބުރި ޓީމާ ގުޅޭނެ ދުވަހަކަށް ކަމަށެވެ. އަނިޔާވެ ޕޮގްބާ އަށް ކުޅެވޭ ގޮތް ނުވުމުގެ ސަބަބުން ޔުވެންޓަސް އިން އޭނާގެ އެއްބަސްވުން އުވާލަން ބޭނުންވާ ކަމުގެ އަޑުތަކެއް ވެސް ފެތުރުނެވެ. ނަމަވެސް ޔުވެންޓަސް އިން ވަނީ އެކަން ދޮގުކޮށްފަ އެވެ.
