ހުސްވެފައިވާ ބެލްޖިއަމް ޤައުމީ ފުޓުބޯޅަ ޓީމުގެ ކޯޗަކަށް ޑޮމެނިކޯ ޓެޑެސްކޯ ހަމަޖައްސައިފި އެވެ.

ބެލްޖިއަމްގެ ކޯޗުކަމުގެ މަޤާމު ހުސްވީ މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕް މުބާރާތަށްފަހު އެވެ. އެ މުބާރާތަށްފަހު ބެލްޖިއަމްގެ ކޯޗުކަމުން ރިބާޓޯ މާޓީނޭޒް ވަކިކުރިއިރު، މިހާރު އޭނާ އަކީ ޕޯޗުގަލް ޤައުމީ ޓީމުގެ ކޯޗެވެ. ބެލްޖިއަމްގެ ކޯޗުކަމާ ޓެޑެސްކޯ ހަވާލުވީ އަންނަ އަހަރު އޮންނަ ޔޫރޯ ފުޓުބޯޅަ މުބާރާތުގެ ނިޔަލަށެވެ. އުމުރުން 37 އަހަރުގެ ޓެޑެސްކޯ އޭނާގެ ކޯޗިން ކެރިއަރު ފެށީ 2017 ވަނަ އަހަރު އެވެ. އެންމެ ފަހުން އޭނާ ހުރީ ޖަރުމަނުގެ އާރްބީ ލައިޕްޒިގްގެ ކޯޗުކަމުގަ އެވެ. 2021 ވަނަ އަހަރުގެ ޑިސެމްބަރު މަހު ލައިޕްޒިގާ ހަވާލުވެ އޭނާ ވަނީ މިދިޔަ އަހަރުގެ ސެޕްޓެމްބަރު މަހުގެ ހަތް ވަނަ ދުވަހާ ހަމަ އަށް އެ ޓީމަށް އިރުޝާދު ދީފަ އެވެ. އޭނާގެ އިރުޝާދުގެ ދަށުން ލައިޕްޒިގް ވަނީ 38 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ 20 މެޗުންނެވެ. ނުވަ މެޗުން ބަލިވެފައިވާއިރު، އަނެެއް ނުވަ މެޗުން ވަނީ އެއްވަރުވެފަ އެވެ. ލައިޕްޒިގާއެކު އޭނާ ވަނީ 22-2021 ވަނަ އަހަރުގެ ޑީއެފްބީ ޕޯކަލް ކާމިޔާބުކޮށްފަ އެވެ.

ކުރިއަށް އޮތް ޔޫރޯ ފުޓުބޯޅަ މުބާރާތަށް ކުޅުމަށް ހަމަޖެހިފައިވާ ކޮލިފައިންގައި ބެލްޖިއަމް އޮތީ ގްރޫޕް އެފް ގައެވެ. ބެލްޖިއަމްގެ އިތުރުން މި ގްރޫޕްގައި ދެން އޮތީ، އޮސްޓްރިއާ، ސެވެޑެން، އަޒަރްބައިޖާން އަދި އެސްޓޯނިއާ އެވެ.