އެމެރިކާގެ ނިއު ޔޯކް ސިިޓީގެ ބްރޮންކްސް ބަރާގެ ހޮސްޕިޓަލެއްގެ ތެރޭގައި ހުކުރު ދުވަހު އެސޯލްޓް ރައިފަލެއް ބޭނުން ކޮށްގެން ދިން ހަމަލާގައި އެ ހޮސްޕިޓަލުގެ ޑޮކްޓަރެއް މަރާލައި ހަ މީހަކު ޒަޚަމްކޮށްފިއެވެ. 

ޒަޚަމްވި ހަ މީހުންގެ ތެރެއިން ފަސް މީހަކު ވަރަށް ބޮޑަށް ޒަޚަމްވެފައިވާ ކަމަށް ވެއެވެ. ހަތިޔާރު އަޅައިގެން ހޮސްޕިޓަލަށް ހަމަލާ ދިން މީހާއަކީ އެ ހޮސްޕިޓަލުގެ ކުރީގެ ޑޮކްޓަރެކެވެ. އޭނާ ވަނީ ހަމަލާ ދިނުމަށް ފަހު އަމިއްލައަށް މަރުވެފައެެވެ. ހާދިސާ ހިނގި ހޮސްޕިޓަލަކީ 1,000 އެނދުގެ ބްރޮންކްސް-ލެބަނަން ހޮސްޕިޓަލެވެ. 

ނިއު ޔޯކްގެ މޭޔަރު ބިލް ޑީ ބްލޭސިއޯ ހަމަލާ އާއި ބޭހޭ ގޮތުން ވިދާޅުވީ ބަޑިޖެހުމުގެ ހާދިސާއަކީ ޓެރަރިޒަމްގެ އަމަލެއް ނޫން ކަމަށާއި އެއީ މަސައްކަތުގެ މާހައުލާ ގުޅޭ ކަމެއް ކަމަށެވެ. މޭޔަރު ހާދިސާ ސިފަ ކުރެއްވީ "ރައްކާތެރިކަމާއި އަރާމާއި ގުޅޭ ތަނެއްގައި ހިނގި ވަރަށް ގޯސް އަމަލެއްގެ" ގޮތުގައެވެ. 

މީގެ އިތުރުން މޭޔަރު ވިދާޅުވީ ހާދިސާގައި ޒަޚަމްވި މީހުން އެބައި މީހުންގެ "ދިރިއުޅުމަށް ހަނގުރާމަ ކުރަމުންދާ" ކަމަށެވެ.

ބަޑި ޖެހި މީހާގެ ނަން ރަސްމީކޮށް އަދި ހާމަކޮށްފައި ނުވާއިރު ބައެއް މީޑިއާތަކުގައި ފުލުހުންނާ ހަވާލާދީ ބުނެފައި ވަނީ ބަޑި ޖެހި މީހާއަކީ އުމުރުން 45 އަހަރުގެ ހެންރީ ބެލްލޯ ނަމަކަށް ކިޔާ މީހެއް ކަމަށެވެ.