ސަސްޕެންޝަނުގެ ބިރު އޮތުމާއެކު ބާސެލޯނާގެ ބައެއް ކުޅުންތެރިންނަށް ޖިރޯނާ މެޗުގައި ރެސްޓު ދޭން ނިންމާފައިވާކަމަށް, އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.

ޒަވީ މިހެން ބުނީ ސްޕެނިޝް ލީގުގައި ހޮނިހިރު ދުވަހުގެ ރޭ ޖިރޯނާގެ ދަނޑުގައި އެ ޓީމާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. އެ މެޗަށް ނުކުންނައިރު ބާސެލޯނާ އޮތީ ތިން ޕޮއިންޓުގެ ލީޑަކާއެކު ލީގު ތާވަލްގެ އެއްވަނާގައެވެ. ޒަވީ ގަބޫލުކުރާގޮތުގައި ޖިރޯނާ މެޗުން ތިން ޕޮއިންޓު ހޯދުމަކީ ވަރަށް މުހިންމު ކަމެކެވެ. އެ މެޗަށް ނުކުންނައިރު ބާސެލޯނާގެ ފެރާން ޓޮރޭސް މިހާރުވެސް ހުރީ ރަތް ކާޑެއް ދެއްކުމުގެ ސަބަބުން ސަސްޕެންޝަންގަ އެވެ. ޒަވީ ބުނީ ޖިރޯނާ މެޗުގައި ބަދަލުތަަކެއް ފެންނާނެކަމަށާއި، އެއީ ޓީމުގެ ތިނެއް ނުވަތަ ހަތަރު ކުޅުންތެރިޔަކަށް ސަސްޕެންޝަންގެ ބިރު އޮތުމުން ކަމަށެވެ.

ޒަވީ ބުނީ އެއީ ބާސެލޯނާއަށް ވަރަށް މުހިންމު ކުޅުންތެރިންތަކެއް ކަމަށާއި، ކުރިއަށް އޮތް ތަނަށް ތައްޔާރުވާން ޖެހޭނީ އެ ކުޅުންތެރިންނާއެކު ކަމަށެވެ. ޓީމުގައި ތިބި ކޮންމެ ކުޅުންތެރިޔަކަށްވެސް އޭނާގެ އިތުބާރު އޮންނާނެ ކަމަށާއި، އެހެންކަމުން ޖިރޯނާ މެޗުގައި ބަދަލުތަކެއް ގެންނަނީ އެކަން ކުޅުންތެރިންނަށް ބުނެދިނުމަށްފަހު ކަމަށެވެ. ޚާއްސަކޮށް މެޗަކީ ތިން ޕޮއިންޓު މުހިންމު މެޗަކަށްވާއިރު، ކޮންމެ ކުޅުންތެރިޔަކުވެސް އެކަމަށް މަސައްކަތް ކުރާނެކަމުގެ ޔަގީންކަން އޮތްކަމަށްވެސް އޭނާ ބުންޏެވެ.

ލީގުގައި މިހާތަނަށް ކުޅުނު 17 މެޗުން 44 ޕޮއިންޓާއެކު ބާސެލޯނާ އޮތީ އެއްވަނާގައެވެ. ހަމަ އެ އަދަދަށް މެޗު ކުޅެގެން ދެވަނާގައި އޮތް، އެންމެ ފަހުގެ ޗެމްޕިއަން ރެއާލް މެޑްރިޑަށް ލިބެނީ 41 ޕޮއިންޓެވެ.