މިފެށުނީ ބޮޑުއުތުރާ، މުޅި ބޮޑުތިލަދުން މައްޗަށް ތާރީޚުގައިވެސް އަންނަ، އެންމެ ބޮޑު ބަދަލުކަމަށް، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ހަނިމާދޫ އިންޓަރނޭޝަނަލް އެއަރޕޯޓުގެ އަމަލީ މަސައްކަތް މިރޭ ފައްޓަވައިދެއްވާ ވާހަކަފުޅުދައްކަވަމުންނެވެ. ރައީސް ޞާލިހް ވިދާޅުވީ މިއަދަކީ ތިލަދުންމައްޗާ، މިލަމަޑުލު އުތުރަށް އުފާވެރި ދުވަހެއް ކަމަށެވެ. ހަނިމާދޫ އަދި މި ބޮޑު ތިލަދުންމަތީ ރައްޔިތުން ދެކެމުން އައި ހުވަފެނުގާ މިއަދު ކުލަޖެހިއްޖެ ކަމަށެވެ.

ރައީސް ވިދާޅުވީ އެމަނިކުފާނުގެ ސަރުކާރުން މަސައްކަތްކުރާ ވަކި އުސޫލުތަކެއް ވައްޓަފާޅިއެއް އޮންނަ ކަމަށެވެ. ކުރާ ކޮންމެ މަސައްކަތަކާ، ހިންގާ ކޮންމެ މަޝްރޫޢެއް ހިންގާނީ އެގޮތަށް ކަމަށެވެ.

ރައީސް ވިދާޅުވީ ހަނިމާދޫ ބައިނަލް އަގްވާމީ އެއާޕޯޓު ގެ މަސައްކަތް މިފެށީ އަޅުގަނޑުމެންގެ ގޮތަށް ކަމަށެވެ. ހުއްޓިއޮވެ، ފަހަތަށް ގޮސް، ގެއްލި ހުސްނުވާ ގޮތަށް ކަމަށެވެ. މިފެށިގޮތަށް ފެށީމާ މާތްﷲ ގެ އިރާދަޔާއިއެކު ދެން މިކަމެއް ނުހުއްޓޭނެ ކަމަށާއި ފަހަތަކަށްވެސް ނުދާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ އަމަލީ މަސައްކަތް ފެށުނު ހަނިމާދޫ އިންޓަރނޭޝަނަލް އެއާޕޯޓަކީ، 136.6 މިލިއަން ޑޮލަރުގެ ބޮޑު މަޝްރޫޢެއް ކަމަށެވެ. މަޝްރޫޢު ހިންގުމަށް އެންމެ ބޮޑު އެއްޗަކީ އެކަމަށް ބޭނުންވާ ފައިސާ ކަމަށާއި، މިމަޝްރޫޢުގެ ފައިސާ ހުރީ ހަމަޖެހި ނިމިފައި ކަމަށް ރައީސް ވިދާޅުވިއެވެ.

މިއީ އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެ، ޒަމާނީ ރީތި ފަސިންޖަރ ޓަރމިނަލް ހިމެނޭ ޕްރޮޖެކްޓެއް ކަމަށް ރައީސް ވިދާޅުވިއެވެ. 2.46 ކިލޯމީޓަރުގެ އާރަންވޭއަކީ، ދުނިޔޭގެ ބައްރުތަކުން ގިނަ ފަސިންޖަރުން އުފުލޭނެ، ބޮޑެތި މަތިންދާ ބޯޓް ފަހަރަށް އަޅާ ރަންވޭއެއް ކަމަށް ރައީސް ވިދާޅުވިއެެވެ.

މީގެ އިތުރަށް، ބައިނަލް އަގްވާމީ އެއަރޕޯޓަށް ބޭނުންވާނެ ހުރިހާ ވަޞީލަތްތައް ހަނިމާދޫގާ ގާއިމް ކުރެވޭނެ ކަމަށް ރައީސް ވިދާޅުވިއެވެ. މި އެއަރޕޯޓް ވެގެންދާނީ ބޮޑުތިލަދުންމައްޗާ، އުތުރުގެ ރައްޔިތުން ފަޚުރުވެރިވާނެފަދަ، ޒަމާނީ އެއަރޕޯޓަކަށް ކަމަށް ރައީސް ވިދާޅުވިއެވެ.