އިރާގުގެ މޫސަލްގެ އަލް ނޫރީ މިސްކިތް އެގައުމުގެ އަސްކަރިއްޔާއިން ހިފައި، އިސްލާމިކް ސްޓޭޓް ޖަމާއަތް ބަލި ކުރެވިފައިވާ ކަަމަށް ބުނެފިއެވެ.
އިރާގު އަސްކަރިއްޔާގެ ލެފްޓިނެންޓް ޖެނެރަލް އަބްދުލް ވައްހާބް އަލް ސާދީ ވިދާޅުވީ އަސްކަރިއްޔާގެ ހާއްސަ ޓީީމަކުން މިސްކިތުގެ ސަރަހައްދަށް ބުރާސްފަތި ދުވަހުގެ ހެނދުނުގެ ވަގުތެއްގައި ވަދެފައިވާ ކަމަށާއި މިސްކިތުގެ ކޮންޓްރޯލް އެއްކޮށް މިހާރު ނަގާފައިވާ ކަމަށެވެ.
އަލް ނޫރީ މިސްކިތަކީ މީގެ ތިން އަހަރު ކުރިން. 29 ޖޫން 2014 ގައި، އިރާގާއި ސީރިޔާގައި ޚިލާފަތެެއް އިއުލާންކޮށް، އިސްލާމިކް ސްޓޭޓް ދައުލަތެެއްގެ ގޮތުގައި އަބޫ ބަކުރު އަލް ބަޣްދާދީ އިއުލާންކުރި ތަނެވެ. މި މިސްކިތުގައި ޚިލާފަތު އިއުލާންކުރި އިރު، ޚިލާފަތުގެ ވެރިއެއްގެ ގޮތުގައި ބަޣްދާދީ ވަނީ އަމިއްލައަށް އައްޔަންވެފައެވެެ.
އިރާގުގެ އަސްކަރިއްޔާ އިން މޫސަލް ހިފުމުގެ އޮޕަރޭޝަން ފެށުމާ ގުޅިގެން، ބަޣްދާދީ މޫސަލް ދޫކޮށްފައިވާ ކަމަށާއި އޭނާ ވަނީ އިރާގާއި ސީރިޔާގެ ބޯޑަރު ސަރަހައްދުގައި ފިލާ ކަމަށްވެސް އިރާގާއި އެމެރިކާގެ ސިފައިން ވަނީ ބުނެފައެވެ.
އައިއެސް ޖަމާއަތުން 2014 ވަނަ އަހަރު އިރާގާއި ސީރިޔާގައި ޚިލާފަތެއް އިއުލާންކުރި އިރު، ޚިލާފަތާ ގުޅުމަށް މުސްލިމުންނަށް ގޮވާލާފައިވެއެވެ. އެ ޖަމާއަތުގެ ގޮވާލުމަށް ގިނަ ބަޔަކު ވަނީ އިޖާބަދީ، އިރާގާއި ސީރިޔާއަށް ހިޖުރަކޮށްފައިވެއެވެ. މީގެ ތެރޭގައި ބައެއް ދިވެހިންވެސް ހިމެނެއެވެ.
