އަންނަ އަހަރު އޮންނަ އޭޝިއަން އިންޑޯ އެތުލެޓިކްސް ޗެމްޕިއަންޝިޕުގައި ވާދަކުރާނެ ދިވެހި ދެ އެތުލީޓަކަށް އަޙްނާ ނިޒާރު އަދި ރޫޔާ އަލީ ހޮވިއްޖެ އެވެ.
ދިހަ ވަނަ އޭޝިއަން އެތުލެޓިކްސް ޗެމްޕިއަންޝިޕް ކުރިއަށް ދާނީ އަންނަ އަހަރުގެ ފެބްރުވަރީ މަހުގެ 11 އިން 13 އަށް ކަޒަކިސްތާނުގެ ނުރު ސުލްތާންގަ އެވެ. އަންނަ އަހަރު ކުރިއަށްދާ މުބާރާތުގައި 29 ޤައުމަކުން ވާދަކުރާނެ އެވެ.
މުބާރާތުގައި ވާދަކުރުމަށް ދެ އެތުލީޓުން ހޮހުވީ އެތުލެޓިކްސް އެސޯސިއޭޝަން އިން، ދެ ޖިންސު އެއްކޮށް ކުރިއަށް ގެންދިޔަ ޓައިމް ޓްރަޔަލް އިންނެވެ. މުބާރާތުގައި ވާދަކުރުމަށް ފުރުސަތު ދިނީ އެންމެ ރަނގަޅު ޓައިމިންގ އެއް ހޯދި ދެ އެތުލީޓުންނަށެވެ.
އަޙްނާ އަކީ މިއަހަރު ބޭއްވި މަކިޓާ ޖޫނިިއާ ޗެމްޕިއަންޝިޕުގެ އަންހެން އެއްވަނަ އެތުލީޓެވެ. އަދި ރޫޔާ އަކީ މިއަހަރު ބޭއްވި ގްރޯން ޕްރީ ގެ އަންހެން އެއް ވަނަ އެތުލީޓެވެ. މި ދެ އެތުލީޓުން ވެސް ވަނީ މީގެ ކުރިން ވެސް ޤައުމީ ޓީމުގައި ހިމެނިފަ އެވެ.
