ބާ ކައުންސިލް އޮފް ދި މޯލްޑިވްސް އިން ނެގުމަށް ހަމަޖެހިފައިވާ ފީތައް އިއުލާނުކޮށްފިއެވެ.
ބާ ކައުންސިލަށް ލިބޭ އާމްދަނީން އެކައުންސިލު ހިންގޭ ފަދަ ގޮތަކަށް ބާ ކައުންސިލުގެ ހިންގުން ބައްޓަންކުރުމަށްޓަކައި ބާ ކައުންސިލަށް އާމްދަނީ ހޯދޭނެ އިތުރު ގޮތްތައް ބަޔާންކުރުމަށް ގާނޫނީ ފަންނުގެ ގާނޫނަށް ވަނީ އިސްލާޙު ހުށައަޅާފައެވެ.
އެ އިސްލާޙުގެ ދަށުން ފީ ނެގުމަށް ހަމަޖެހިފައިވަނީ މިފެށޭ އައު އަހަރުން ފެށިގެންނެވެ. އެގޮތުން ނަގާ ފީ 11 ބަޔަކަށް ވަނީ ބަހާލާފައެވެ.
- ގާނޫނީ ވަކީލު ކަމުގެ ހުއްދައަށް އެދޭއިރު 2000ރ.
- ސުޕްރީމް ކޯޓުގެ ހުއްދަ 2000ރ.
- ހައި ކޯޓުގެ ހުއްދަ 1500ރ.
- ޕަބްލިކް ނޯޓަރީގެ ހުއްދަ ދޫކުރުން އަދި އާ ކުރުން 2000ރ.
- ލޯ ފާމް ރަޖިސްޓާ ކުރުމަށް އަދި އަހަރީ ފީއަށް 2000ރ.
- ލީގަލް ޕްރެކްޓިސް ރަޖިސްޓާ ކުރުމަށް އަދި އަހަރީ ފީ 1000ރ.
- ގާނޫނީ ވަކީލުކަމުގެ ހުއްދަ ލިބިފައިވާކަން އަންގައިދޭ ކާޑު ހެދުމަށް އަދި އާކުރުމަށް 500ރ.
- ގާނޫނީ ވަކީލުކަމުގެ ހުއްދަ ގެއްލިގެން އަލުން ހެދުން 1000ރ.
- ގާނޫނީ ވަކީލުކަމުގެ ހުއްދަ ޓްރާންސްލޭޝަން 1000ރ.
- ސެޓްފިކެޓް އޮފް ގުޑްސްޓޭންޑިން 1000ރ.
- އެގްޒެކެޓިވް ކޮމިޓީގެ އިންތިހާބުގެ އިދާރީ ފީ 5000ރ.
ގާނޫނީ ފަންނުގެ ގާނޫނަށް އަމަލުކުރަންފެށިއިރު ގާނޫނީ ރޮނގުން ފުރަތަމަ ޑިގްރީ ހާސިލުކޮށްފައިވާ ފަރާތްތަކުގެ ތެރެއިން މިގާނޫނުގެ ދަށުން ހިންގާފައިވާ ޚާއްސަ ތަމްރީނު ޕްރޮގްރާމް ފުރިހަމަކޮށް، އިމްތިހާނެއްގައި ބައިވެރިވުމަށްފަހުގައި ގާނޫނީ ވަކީލުކަމުގެ ހުވާކޮށްފައިވާ ފަރާތްތަކުން ބާ އިމްތިހާނު ހަދައި އަލުން ހުވާކުރަންޖެހޭކަމަށް އޮތްއޮތުން އުވާލުމަށްވެސް މި ޤާނޫނަށް ހުށައެޅި އިސްލާޙުގައިވެއެވެ.
އަދި ގާނޫނީ ވަކީލުންގެ ސުލޫކީ ޝަކުވާގެ ގޮތުގައި ބާ ކައުންސިލަށް ހުށަހެޅޭނެ ޝަކުވާގެ ބާވަތްތައް ގާނޫނުގައި އިތުރަށް ތަފްސީލު ކޮށްފައިވެއެވެ.
