ބަޔާނަަށް ކުޅެމުން އަންނަ ޖަރުމަނުގެ އެޓޭކިން މިޑްފީލްޑަރު ޖަމާލް މުސިއާލާގެ އެއްބަސްވުން ދިގު މުއްދަތަކަށް އައު ކުރުމަށް އެ ކުލަބުން ތައްޔާރުވެއްޖެ އެވެ.

އުމުރުން 19 އަހަރުގެ ޒުވާން ކުޅުންތެރިޔާ އޭނާގެ ސީނިއާ ކެރިއަރު ފެށީ 2020 ވަނަ އަހަރު ބަޔާނުންނެވެ. މުސިއާލާ އަށް ބަޔާންގެ އެއް ވަނަ ޓީމުން ޖާގަ ލިބުނީ ވެސް އެ އަހަރު އެވެ. އެއީ އޭނާ ދައްކަމުން އައި މޮޅު ކުޅުމުގެ ސަބަބުންނެވެ. އަދި ބަޔާންގެ ސީނިއާ ޓީމަށް ބަދަލުވުމަށް ފަހު ވެސް މުސިއާލާ އަންނަނީ މޮޅަށް ކުޅެމުންނެވެ. ކުލަބުގައި މުސިއާލާ ދައްކަމުން އައި މޮޅު ކުޅުމުގެ ސަބަބުން 2021 ވަނަ އަހަރު އޭނާ އަށް ވަނީ ޖަރުމަނުގެ ޤައުމީ ޓީމުން ވެސް ޖާގަ ލިބިފަ އެވެ.

މިހާރު ކުރިއަށްދާ ސީޒަންގައި ވެސްް މުސިއާލާ އަންނަނީ ޖަރުމަނު ލީގުގައި މޮޅަށް ކުޅެމުންނެވެ. މި ސީޒަންގެ ޖަރުމަނު ލީގުގައި މިހާތަނަށް ބަޔާނަށް ކުޅެދިން 22 މެޗުގައި އޭނާ ވަނީ 12 ލަނޑު ޖަހާފަ އެވެ. ބަޔާންގެ ކޯޗު ހޫލިއަން ނާގަލްސްމަން އެންމެ އިސްކަންދޭ ކުޅުންތެރިންގެ ތެރޭގައި ވެސް މުސިއާލާ ހިމެނެ އެވެ. ބަޔާނާއެކު މުސިއާލާ މިހާރު ހަދާފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރު އެވެ. ނަމަވެސް އަންނަ އަހަރު ބަޔާނުން މުސިއާލާ އަށް އައު އެއްބަސްވުމެއް ހުށަހަޅަން ތައްޔާރުވަމުން އަންނަ ކަމަށް މީޑިއާ ރިޕޯޓުތައް ބުނެ އެވެ. ބަޔާނުން ބޭނުންވަނީ މުސިއާލާ ދިގު މުއްދަތަކަށް އެ ކުލަބުގައި މަޑުކުރަން ކަމަށް ރިޕޯޓުތައް ބުނެ އެވެ. ސަބަބަކީ މުސިއާލާއަކީ ބަޔާންގެ މުސްތަޤުބަލުގައި މޮޅު ކުޅުންތެރިޔަކަށްވާނެ ކަމަށް ކުލަބުގެ ކޯޗާއި އިސްވެރިން ދެކޭތީ ކަމަށް ވެސް ރިޕޯޓުތައް ބުނެ އެވެ. މީގެ އިތުރުން ވީހާ ވެސް އަވަހަކަށް އައު އެއްބަސްވުމެއް އެކުލަވާލައި، މުސިއާލާއާއެކު ސޮއިކުރުމަށް ބަޔާނުންވާ ކަމަށް ވެސް ރިޕޯޓުތައް ބުނެ އެވެ.

މުސިއާލާގެ އިތުރުން ބަޔާނަށް ކުޅެމުން އަންނަ ލޫކަސް ހެނާންޑޭޒް އާއި އަލްފޮންސޯ ޑޭވިސްގެ އެއްބަސްވުން އައު ކުރަން އެ ކުލަބުން މަސައްކަތް ކުރަމުން އަންނަ ކަމަށް ރިޕޯޓުތައް ބުނެ އެވެ.