މަރުވެގެން އުޅެނީ ރިލްވާން އެކަނިތޯ ސުވާލުކުރައްވައި، މިސަރުކާރުން ވެރިކަމަށް އައުމަށް މަރުގެ ކާޑު ބޭނުންކުރާކަމަށް ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީން ތުހުމަތުކުރައްވައިފިއެވެ.

ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބަލަން އުފައްދާފައިވާ ރިޔާސީ ކޮމިޝަނުން މިމަހު 15 ވަނަ ދުވަހު ވަނީ، މިނިވަން ނޫހުގެ ނޫސްވެރިޔާ އަހުމަދު ރިލްވާން އަބްދުﷲގެ މައްސަލައިގައި ތައްޔާރުކޮށްފައިވާ ރިޕޯޓް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް އަރުވާފައެވެ. ރައީސަށް ރިޕޯޓް އެރުވި ދުވަހު ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ވަނީ، ރިލްވާން މަރާލުމާގުޅިގެން ބޮޑެތި ތުހުމަތުތަކެއް ކުރެވޭ ތ. އޮމަދޫ މުހައްމަދު މުނާޒު، ކުރީގެ ރައީސް އަބްދުﷲ ޔާމީނާ ބައްދަލުކޮށް، ރިލްވާން މަރާލިގޮތުގެ ތަފްސީލް ހިއްސާކޮށްފައިވާކަމަށް ބުނެފައެވެ. ކޮމިޝަންގެ މެމްބަރު މިސްބާހް އައްބާސް ވިދާޅުވީ މުނާޒް ރާއްޖެއިން ބޭރަށް ފުރާފައިވަނީވެސް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ އެހީތެރިކަމާއެކުގައި ކަމަށެވެ.

މިވާހަކަތައް ފެންމަތިވެފައިވަނިކޮށް އިދިކޮޅު ޕީޕީއެމް/ޕީއެންސީން ހުކުރު ދުވަހުގެ ރޭ ކާނިވާ ސަރަހައްދުގައި ބޭއްވި "ފެލާލައިފި" ޖަލްސާގައި ވާހަކަފުޅުދައްކަވަމުން ޔާމީން ވަނީ، ރިލްވާންގެ މަރާގުޅިގެން މިސަރުކާރަށާއި ފުލުހުންނަށް ތުހުމަތުތައް ކުރައްވައި، ފުލުހުންގެ މުއައްސަސާގައި ތިބީ ގަމާރުންތަކެއް ނުވަތަ ބީތާއީންތަކެއްތޯ ސުވާލުކުރައްވާފައެވެ.

ޔާމީން ވިދާޅުވީ މިސަރުކާރަކީ މަރުފަލި ޖަހަމުންދާ ސަރުކާރެއްކަމަށާއި، މިހާރު ސަރުކާރުން ބޭނުންކުރަނީ މަރުގެ ކާޑުކަމަށެވެ. މިހާރު ބޭނުންކުރާ ކާޑަކީ ރިލްވާންގެ ކާޑުކަމަށާއި ވެރިކަމަށް އަންނަންވެގެންވެސް ބޭނުންކުރީ މަރުގެ ކާޑުކަމަށާއި ވެރިކަން ނިމޭއިރުވެސް ނަގަނީ މަރުގެ ކާޑުކަމަށެވެ.

ޔާމީން ވިދާޅުވީ ރިލްވާން މަރާލި މީހުން މިސަރުކާރުގައި ތިބި މީހުންނަށް އެނގޭނެކަމަށާއި, ފުލުހުންނަށްވެސް އެނގޭނެކަމަށެވެ. ރިލްވާން ހުޅުމާލެއިން ކާރަކަށް އެރުވިކަން އެނގޭއިރު, ޔާމީން ވިދާޅުވީ ކާރު ދުއްވީ ކާކުކަންވެސް އެނގޭކަމަށެވެ.

ޔާމީން ތަކުރާރުކޮށް ވިދާޅުވީ ރިލްވާން ގެއްލުވާލި މައްސަލައަކީ ތަހުގީގު ނިމިފައިވާ މައްސަލައެއްކަމަށާއި, ޕާސްޕޯޓު ހަދައިދިން މީހުންގެ ކަންކަންވެސް ބަލައި ނިމިފައިވާކަމަށެވެ.

ކޮމިޝަނުން ބޭއްވި ނޫސްވެރިންގެ ބައްދަލުވުމުގައި، މުނާޒު ރާއްޖެއިން ފުރުމުގެ ކުރިން ކުރީގެ ރައީސް ޔާމީނާ ބައްދަލުކުރިކަން ކޮމިޝަނަށް އެނގިފައިވާކަމަށް މިސްބާހު ވިދާޅުވިއެވެ. މިސްބާހު ވިދާޅުވީ މުނާޒް ރައީސް ޔާމީނަށް އެ ވާހަކަތައް ދަންނަވާފައިވަނީ އޭނާގެ ބައިވެރިވުން ނުހިމެނޭގޮތަށް ކަމަށެވެ. އެގޮތުން، ރިލްވާން ގަދަކަމުން ކާރަކަށް ލައިގެން ގެންގޮސް މަރާލުމުގައި ބައިވެރިވި މީހުންނާއި، އެކަން ކުރިގޮތް ރައީސް ޔާމީނަށް މުނާޒް ދަންނަވާފައިވާކަން ކޮމިޝަންގެ ތަހުގީގަށް އެނގިފައިވާކަަމަށް މިސްބާހު ވިދާޅުވިއެވެ.

ރިލްވާނަށް ފާރަލީކަމަށް ތުހުމަތުކުރެވޭ ސ. ހުޅުދޫ އަތިރިއާގެ މުހައްމަދު ސުވައިދުވެސް ކޯޓު އަމުރެއްގެ ދަށުން ދޫކޮށްލާފައިވާކަމަށް ކޮމިޝަނުން ބުނެއެވެ. އަދި ރިލްވާންގެ މަރާގުޅިގެން ބޮޑެތި ތުހުމަތުތަކެއް ކުރެވޭ އަޒްލީފް ރައޫފް މުޅިން ސަލާމަތްވީ އޭނާގެ ބަންދުގެ އަމުރު ބާތިލުވުމުން ކަމަށް ކޮމިޝަނުން ވަނީ ބުނެފައެވެ. މީގެ އިތުރުން، ރިލްވާންގެ މަރާ ގުޅުންހުރި ތުހުމަތުތަކުގައި ކޯޓު އަމުރެއްގެ ދަށުން ހައްޔަރުކޮށްފައިވާ މީހުން ނުކުމެ، އާންމުތަންތަނަށް އެއްވެ، އޭރުގެ ރައީސް އަބްދުﷲ ޔާމީން ބައިވެރިވާ އިވެންޓުތަކުގައާއި ސަރުކާރުގެ އިސްވެރިން ބައިވެރިވާ އިވެންޓުތަކުގައިވެސް އެ މީހުން ބައިވެރިވެފައިވާކަމަށް ކޮމިޝަނުން ވަނީ ބުނެފައެވެ.

ނޫސްވެރިންގެ ބައްދަލުވުމުގައި މަރު ކޮމިޝަނުގެ ރައީސް ފަރީޝާ އަބްދުﷲ ވިދާޅުވިގޮތުގައި، ރިލްވާން މަރާލުމުގައި އަމަލީގޮތުން ބައިވެރިވި މީހުން މިހާރު ވަނީ މަރުވެފައެވެ. އެމީހުން މަރުވެފައިވަނީ ސީރިއާ ހަނގުރާމައިގައި ކަމަށް ބެލެވޭކަމަށް މަރު ކޮމިޝަނުން މައުލޫމާތުދެއެވެ. ނަމަވެސް އެކަން ރަސްމީ އިދާރާއަކުން ކަށަވަރުކޮށްދީފައެއް ނުވެއެވެ.

މި މައްސަލައިގައި ތުހުމަތުކުރެވޭ ފަރާތްތަކުގެ ތެރެއިން ސީރިޔާއަށް ދަތުރުކޮށްފައިވާކަމަށް މައުލޫމާތު ލިބިފައިވާ ފަރާތްތަކަކީ; ޏ. ފުވައްމުލަކު ދަނޑިމަގު އިސްމާއީލް ޝަބީހުއާއި، ސ. ހުޅުދޫ އަތިރީއާގެ މުހައްމަދު ސުއައިދުއާއި، ސ. މީދޫ އިރާކު މުހައްމަދު ހާމިދާއި، ތ. އޮމަދޫ ނަރުގިސްވިލާ މުހައްމަދު މުނާޒުއާއި ހ. ހިލްޓަން އަޒްލީފް ރައޫފް، އަދި ހއ. ދިއްދޫ ސޯސަނީ އިބްރާހީމް ސަލާހުއެވެ.