އައްޑޫ ސިޓީގެ ޖުޑީޝަލް ދާއިރާގެ އިސްމެޖިސްޓްރޭޓް އަލްއުސްތާޛު މުޙައްމަދު ހާޝިމް އާއި ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛާ ޒިޔާދާ ޠާހިރުގެ މައްސަލަ ތަޙްޤީޤުކުރުމަށް ނިންމައިފިއެވެ.

އެކަން ހާމަކޮށް ޖުޑީޝަލް ސަރވިސް އިން ނެރުނު ބަޔާނެއްގައި ބުނެފައި ވަނީ ހާޝިމްގެ އިތުރުން އައްޑޫ ސިޓީ ހިތަދޫ ކޯޓުގެ ދެ މެޖިސްޓްރޭޓުންގެ މައްސަލަ ބަލަން އެ ކޮމިޝަނުން ނިންމާފައިވާ ކަމަށެވެ.

ޖޭއެސްސީ އިން ބުނީ އެފަދަ މައްސަލަ އެއް ބަލަން ނިންމީ ސ.ހިތަދޫ މެޖިސްޓްރޭޓް ކޯޓުން ބަންދާމެދު ގޮތެއް ނިންމުމަށް ބޭއްވި މައްސަލައަކަށްފަހު އެ ނިންމުމާ ގުޅޭ ގޮތުން ނޫސްބަޔާނެއް ނެރުނު މައްސަލަ އާއި ގުޅިގެން، ފަނޑިޔާރުންގެ ސުލޫކީ މިންގަނޑާ ޚިލާފަށް ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛު ރަފީޢުއްދީން އަޙްމަދު ޢަމަލުކޮށްފައިވާކަމަށް ބެލެވޭތީ ބެލި މައްސަލައިގެ ތެރެއިން ފާހަގަކުރެވުނު ކަންކަމާއި ގުޅިގެން ކަމަށެވެ.

އެގޮތުން  2022 މާރޗް 02 ދުވަހު ތަޚްޤީޤު ކުރަން ފެށި އެ މައްސަލައިގެ ތަޙްޤީޤުގެ ތެރެއިން ސ.ޖުޑީޝަލް ދާއިރާގެ އިސްމެޖިސްޓްރޭޓް އަލްއުސްތާޛު މުޙައްމަދު ހާޝިމް އާއި ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛާ ޒިޔާދާ ޠާހިރުވެސް މި ތުހުމަތުގައި ސުލޫކީ މިންގަނޑާ ޚިލާފަށް ޢަމަލުކޮށްފައިވާކަމަށް ބެލެވޭ ކަމަށް ޖޭއެސްސީ އިން ވަނީ ބުނެފައެވެ.

އެހެންކަމުން އިސްމެޖިސްޓްރޭޓް އަލްއުސްތާޛު މުޙައްމަދު ހާޝިމް އާއި ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛާ ޒިޔާދާ ޠާހިރުގެ މައްސަލަ ބެލުމަށް ނިންމާފައި ވަނީ 2022 ނޮވެމްބަރ 27 ވީ އާދީއްތަ ދުވަހު ބޭއްވި ޖުޑީޝަލް ސަރވިސް ކޮމިޝަނުގެ 85 ވަނަ ޖަލްސާގައި ކަމަށް އެ ކޮމިޝަނުން ބުނެއެވެ. ޖޭއެސްސީ އިން ވަނީ މި މައްސަލަ ބަލަން ކޮމިޓީއެއް ވެސް އެކުލަވާލައިފައެވެ.