މޯލްޑިވްސް މީޑިއާ ކައުންސިލް (އެމްއެމްސީ) އިންތިޚާބު 2022 ގައި ވޯޓުލުމަށް ރަޖިސްޓްރީކުރި ފަރާތްތަކުގެ ދާއިމީ ލިސްޓު އާންމުކޮށްފިއެވެ.

މިނިސްޓްރީ އޮފް ހޯމް އެފެއާޒްއިން ވަނީ އިންތިޚާބުގައި ވޯޓުލާން ރަޖިސްޓްރީކުރި ފަރާތްތަކުގެ ދާއިމީ ލިސްޓު އާންމުކޮށްފައެވެ. މި ލިސްޓުގައި ވާގޮތުން މި އިންތިޚާބުގައި ވޯޓުލުމަށް 100 ފަރާތަކުން ވަނީ ރަޖިސްޓްރީކޮށްފައެވެ.

މީޑިޔާ ކައުންސިލުގެ އިންތިޚާބު ބޭއްވުމަށް ހަމަޖެހިފައިވަނީ ޑިސެމްބަރު 10 ވަނަ ދުވަހުއެވެ. އިންތިޚާބު މި ބާއްވަނީ 15 މެންބަރުން ހިމެނޭ މީޑިޔާ ކައުންސިލުގެ 13 ގޮނޑިއެއް ހުސްވާތީއެވެ. 13 ގޮނޑިއަށް ވާދަކުރުމަށް 22 ފަރާތަކުން ނަން ހުށަހަޅާފައިވެއެވެ.

13 ގޮނޑީގެ ތެރެއިން އިންތިހާބު ކުރާނީ މީޑިއާތަކުން ތަމްސީލު ކުރާ 7 މެންބަރަކާއި އާންމުންގެ ފަރާތުން އިންތިހާބު ކުރާ 6 މެންބަރެކެވެ. މީޑިޔާތަކަށް ޚާއްސަކޮށްފައިވާ 7 ގޮނޑިއަށް 10 މީހަކު ވާދަކުރެއެވެ. އަދި އަމިއްލަ 6 މެންބަރުންގެ ގޮނޑިއަށް 12 މީހަކު ވާދަކުރެއެވެ. ހޯމް މިނިސްޓްރީން ވަނީ ކެންޑިޑޭޓުންގެ ނަން ތަރުތީބުކުރުމަށްފަހު އާންމުކޮށްފައެވެ.