ބްރެޒިލްގެ ފުޓްބޯޅަ ލެޖެންޑު، ޕެލޭގެ ސިއްހީ ހާލަތު ގޯސްވެ، އުންމީދު ކަނޑާލާފައިވާކަމަށް ރިޕޯތުތައް ބުނެފިއެވެ.
އުމުރުން 82 އަހަރުގެ ޕެލޭ ހޮސްޕިޓަލުގައި އެޑްމިޓްކުރީ އޭނާގެ މުޅިހަށިގަނޑު ދުޅަވުމުގެ އިތުރުން ހާޓް ފެއިލިއާއެއްގެ ސަބަބުން ކަމަށް ރިޕޯޓުތައް ބުނެއެވެ. ބްރެޒިލްގެ ސައޯ ޕައުލޯގައި ހުންނަ އަލްބަރޓް އެއިންސްޓެއިން ހޮސްޕިޓަލަށް އޭނާ ގެންދިޔައީ މިދިޔަ އަންގާރަ ދުވަހުގެ ވަގުތެއްގައެވެ.
ޕެލޭ އަންނަނީ ގޮހޮރުގެ ކެންސަރަށްވެސް ފަރުވާ ކުރަމުންނެވެ. ނަމަވެސް ކެންސަރަށް ފަރުވާ ކުރުމަށް ދޭ ކީމޯ ތެރަޕީގެ އަސަރުވެސް މިހާރު ނުކުރާތީ، އުންމީދު ކަނޑާލާފައިވާ ކަމަށް ރިޕޯޓުތައް ބުނެއެވެ.
ޕެލޭ ވަނީ ބްރެޒިލްގެ ގައުމީ ޓީމާއެކު ވޯލްޑް ކަޕްގެ ތަށި ތިން ފަހަރު އުފުލާލާފައެވެ. މިއީ އެއް ކުޅުންތެރިއަކު އެންމެ ގިނަ އަދަދަކަށް ވޯލްޑް ކަޕް ކާމިޔާބުކުރި އަދަދެވެ. ބްރެޒިލާއެކު ޕެލޭ ވޯލްޑް ކަޕް ކާމިޔާބުކުރީ 1958، 1962 އަދި 1970ގައެވެ. އޭނާ ވަނީ ބްރެޒިލް ޓީމަށް ކުޅެދިން 92 މެޗުގައި 77 ލަނޑު ޖަހާފައެވެ.
