ގަތަރާ ދެކޮޅަށް ދަތިކުރުމުގެ ފިޔަވަޅުތައް އަޅާފައިވާ އަރަބި ގައުމުތަކުން އެ ގައުމަށް ކޮށްފައިވާ ޑިމާންޑްތަަކަކީ އެއަށް އަމަލުކުރަން ދަތި ޑިމާންޑްތަކެއް ކަމަށް އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލާސަން ވިދާޅުވެއްޖެއެވެ.

އެމެރިކާގެ އެންމެ އިސް ޑިޕްލޮމޭޓް އާދީއްތަ ދުވަހު ނެރުއްވާފައިވާ ބަޔާނުގައި ވިދާޅުވެފައި ވަނީ ސައުދީ އަރަބިއްޔާ އާއި، ޔުނައިޓެޑް އަރަބް އެމިރޭޓްސް އާއި، ބަހްރެއިނާއި މިސްރުން ހުށަހަޅާފައިވާ ލިސްޓުގައި"މިހާރު ވާހަކަ ދެކެވޭ ކަންކަމުގެ ތެރެއިން އެއްބަސްވުމެއްގެ އަސާސްތައް ގެނެސްދޭ ބައެއް ބައިތައް" ހުރި ކަމަށެވެ.

ޓިލަރސަން ވިދާޅުވީ ދެން އޮތް ހަރުފަތަކީ ހުރިހާ ގައުމަކަށް ވެސް އުފެއްދުންތެރި ހަރުފަތަކަށް ހެދުމަށް ހުރިހާ ގައުމަކުން އެއްކޮށް އިށީނދެ މަޝްވަރާ ކުރަން ޖެހޭ ކަމަށެވެ.

ޓިލަރސަން ވިދާޅުވީ ގަތަރަށް ހުށަހަޅާފައިވާ ޑިމާންޑްތައް އެ ގައުމުން ބަލަން ފަަށާފައިވާ ކަމަށެވެ.

"އަޅުގަނޑުމެން ގަބޫލުކުރަން ޓެރެރިޒަމް ހުއްޓުވުން އަދި ޓެރެރިޒަމާ ދެކޮޅަށް އެކުގައި އެއް ގޯލަކަށް މަސައްކަތްކުރާއިރު އަޅުގަނޑުމެންގެ ބައިވެރިންނަކީ ވަރުގަދަ ބައެއް ކަމަށް" ޓިލަރަސަން ވިދާޅުވިއެވެ.

މީގެ އިތުރުން ޓިލަރަސަން ވަނީ ނުތަވަސްކަން ކުޑަކުރުމަށްޓަކައި އަސްލެއް ނެތް ވާހަކަތައް މަދުކުރުމަށް ގޮވާލައްވާފައެވެ. އަދި މައްސަލަ ހައްލުކުރުމަށް ކުވައިތުން މެދުވެރިއެއްގެ ދައުރު އަދާކުރުމަށް ކުރަމުންދާ މަަސައްކަތަށް ވޮޝިންގޓަނުން އެހީތެރިކަން ދޭނެ ކަމަށް ބުނެފައި ވެއެވެ.

ސައުދީ އިސްވެ އޮވެ އަރަބި ހަ ގައުމަކުން ގަތަރާ އޮންނަ ޑިޕްލޮމެޓިކް ގުޅުން ކަނޑާލާފައިވައިވަނީ ޖޫން މަހުގެ 5 ވަނަ ދުވަހުއެވެ.

ސައުދީ އަރަބިއާ އިސްވެއޮވެ، ޤަތަރު އެކަހެރިކޮށް، ޤަތަރަށް އެކި ކަހަލަ ދަތިކުރުމުގެ ފިޔަވަޅުތައް އަޅާފައިވާ މައްސަލަ ހައްލުކުރުމަށް ކުވެއިތު މެދުވެރިކޮށް، ޤަތަރަށް ހުށަހަޅާފައިވަނީ ހަމަނުޖެހޭ 13 ޝަރުތު ކަމަށް ޤަތަރުންވަނީ ބުނެފައެވެ.

ޤަތަރުގެ ފޮރިން މިނިސްޓްރީން ހުކުރު ދުވަހުގެރޭ ފަތިހު ނެރުނު ބަޔާނެއްގައި ބުނެފައިވަނީ، ޤަތަރު ހިޞާރުކޮށްގެން އުޅޭ ޤައުމުތަކާއި މިޞްރުގެ ފަރާތުން ޖޫން 22 ވަނަ ދުވަހު ހުށަހެޅުންތަކެއް ލިބިފައިވާ ކަމަށެވެ.

ބަޔާނުގައި އިތުރަށް ބުނެފައިވަނީ، މި ހުށަހެޅުންތަކަށް އެކަށޭނަ ރައްދެއް ދިނުމަށް، ހުށަހެޅުންތައް ދިރާސާކުރަމުންދާ ކަމަށެވެ.

ކުވެއިތު މެދުވެރިކޮށް ސައުދީއާއި އޫއޭއީއާއި، ބަޚްރެއިންގެ އިތުރުން މިޞްރުން ވަނީ ޤަތަރަށް 13 ކަމެއް ހުށަހަޅާފައެވެ.

އޭގެ ތެރޭގައި އިރާނާއެކު ޤަތަރުން ބާއްވާ ސިޔާސީ ގުޅުން ހަނިކޮށް، ޤަތަރުގައި ހުރި އިރާނުގެ ޑިޕްލޮމެޓިކް މިޝަން ބަންދުކުރުމާއި، ގަތަރުގައި ތިބި އިރާނުގެ ރިވޮލޫޝަނަރީ ގާޑުގެ ސިފައިން ޤަތަރުން ބޭރުކޮށް، އިރާނާއެކު އޮންނަ އަސްކަރީ ގުޅުން ކަނޑާލުމާއި، ގަތަރުގައި ތުރުކީން ބިނާކުރާ އަސްކަރީ ބޭސްގެ މަސައްކަތް ވަގުތުން ހުއްޓުވުމާއި އަސްކަރީ ގޮތުން ތުރުކީ އާއި އޮންނަ ގުޅުން ކަނޑާލުން އަދި ދުނިޔޭގެ އެންމެ މަޝްހޫރު އެއް ނޫސް އިދާރާ ކަމަށްވާ ގަތަރުގެ އަލްޖަޒީރާ ބަންދުކުުރުން ފަދަ ކަންކަން ހިމެނެއެވެ.