ޕާކިސްތާނުގެ ބަހަލްވަޕޫރުގައި ތެޔޮ ޓޭންކަރެއް ގޮވުމުގެ ހާދިސާގައި ގިނަ ބަޔަކު މަރުވެ، އިތުރު ބަޔަކު ޒަޚަމްވުމާ ގުޅިގެން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ޕާކިސްތާނުގެ ބޮޑުވަޒީރު މުޙައްމަދު ނަވާޒް ޝަރީފަށް ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި، މި ޚަބަރު އެއްސެވީ ފުން ހިތާމައާއެކު ކަމުގައި ވިދާޅުވެ، ޤައުމީ ހިތާމައިގެ މި ދަނޑިވަޅުގައި ދިވެހި ސަރުކާރާއި ރައްޔިތުންނާއި، އަދި ރައީސުލްޖުމްހޫރިއްޔާގެ އަމިއްލަ ނަންފުޅުގައި، ޕާކިސްތާނުގެ ބޮޑުވަޒީރަށާއި، ސަރުކާރަށާއި ރައްޔިތުންނަށް އިޚްލާސްތެރި ހަމްދަރުދީ ފޮނުއްވާފައިވެއެވެ.

އަދި މި ހާދިސާއާ ގުޅިގެން ލިބިފައިވާ ގެއްލުންތަކުން އަރައިގަތުމަށް ކުރަމުންދާ މަސައްކަތްތަކަށް ކާމިޔާބީ އެދިވަޑައިގަންނަވާ ކަމަށާއި، ހާދިސާގައި މަރުވެފައިވާ މީހުންގެ އާއިލާތަކަށާއި، ގެއްލުން ލިބުނު ފަރާތްތަކަށް ކެތްތެރިކަން ދެއްވުމަށް އެދިވަޑައިގަންނަވާ ކަމުގައިވެސް ރައީސުލްޖުމްހޫރިއްޔާ ވިދާޅުވެފައިވެއެވެ.

އާދިއްތަ ދުވަހުގެ ހެނދުނުގެ ވަގުތެއްގައި ކަރާޗީން ލާހޯރަށް ދަތުރު ކުރަމުން ދިޔަ ތެޔޮ ޓޭންކަރެއް، ޕަންޖާބު ޕްރޮވިންސްގެ ބަހަވަލްޕޫރު ކައިރިން ހައިވޭ އިން ފުރޮޅާލުމުގެ ސަބަބުން، ޓޭންކަރުން ތެޔޮ ލީކުވެ، ޓޭންކަރު ގޮވުމާއި ގުޅިގެން ހިނގި ހާދިސާގައި 150 އަށްވުރެ ގިނަ މީހުން މަރުވެ، 120 އަށްވުރެ ގިނަ މީހުން ވަނީ ޒަޚަމްވެފައެވެ.