މިއަހަރު އަންނާނެ ކަމަށް ލަފާކޮށްފައިވާ ފަތުރުވެރިންގެ ޓާގެޓް އަންނަ މަހުގެ ތިންވަނަ ހަފުތާގައި ހާސިލުވާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

ފަތުރުވެރިކަމުގެ އެންމެ ފަހުގެ ތަފާސްހިސާބުތައް ހިއްސާ ކުރައްވައި މިނިސްޓަރު މައުސޫމް ވިދާޅުވީ މިއަހަރުގެ ނޮވެމްބަރު މަހުގެ 23 ވަނަ ދުވަހާ ހަމައަށް އައި ފަތުރުވެރިންގެ އަދަދު މިދިޔަ އަހަރު އައި ޖުމްލަ ފަތުރުވެރިންގެ އަދަދާ އަޅާބަލާއިރު 7.5 އިންސައްތަ އިތުރުވެފައިވާ ކަމަށެވެ. އަހަރު ނިމެން އަދި 38 ވަރަކަށް ދުވަސް އޮތްއިރު 1.6 މިލިއަން ފަތުރުވެރިންގެ ޓާގެޓް އަންނަ ޑިސެމްބަރު މަހުގެ ތިންވަނަ ހަފުތާގައި ހާސިލުވާނެ ކަމަށް އޭނާ ވިދާޅުވިއެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުގައި ބުދަ ދުވަހުގެ ނިޔަލަށް ރާއްޖެ އައި ފަތުރުވެރިންގެ އަދަދު ވަނީ 1،456،170 (އެއް މިލިއަން ހަތަރުލައްކަ ފަންސާސް ހަ ހާސް އެއް ސަތޭކަ ހަތްދިހަ) އަށް އަރައިފައެވެ. މިދިޔަ އަހަރު އައި ޖުމްލަ ފަތުރުވެރިންގެ އަދަދަކީ 1،321،937 (އެއް މިލިއަން ތިންލައްކަ އެކާވީސް ހާސް ނުވަސަތޭކަ ތިރީސް ހަތް) އެވެ.

މިއަހަރު ދުވާލެއްގެ މައްޗަށް އެވްރެޖުކޮށް 4،453 ފަތުރުވެރިން ރާއްޖެ ޒިޔާރަތް ކުރެއެވެ. ތަފާސްހިސާބުތައް ދައްކާގޮތުން އެންމެ ގިނައިން ފަތުރުވެރިން ޒިޔާރަތް ކުރަނީ ހޮނިހިރު އަދި އާދީއްތައިގައެވެ.

ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރަނީ އިންޑިއާއިންނެވެ. އެ ޤައުމުން ރާއްޖެ އަންނަ ފަތުރުވެރިންގެ 14 އިންސައްތަ ހިއްސާ ކުރާއިރު އެއީ 190،350 ފަތުރުވެރިންނެވެ. ދެވަނަ އަށް އޮތް ރަޝިއާއިން ފަތުރުވެރިންގެ 12.3 އިންސައްތަ ހިއްސާ ކުރާއިރު އިނގިރޭސިވިލާތުން 10.9 އިންސައްތަ، ޖަރުމަނުން 8.2 އިންސައްތަ، އިޓަލީން 5.5 އިންސައްތަ ހިއްސާ ކުރެއެވެ.

ކޮވިޑާ ގުޅިގެން ރާއްޖޭގެ ފަތުރުވެރިކަމަށް އައި ހީނަރުކަމުން އަރައިގަނެވިފައިވާއިރު ޤައުމީ އެއަރލައިން ހިމަނައިގެން މިވަގުތު 30 އެއަރލައިނަކުން ބައިނަލްއަގުވާމީ ދަތުރުތައް ރާއްޖެއަށް ކުރެއެވެ. އެއީ ޔޫރަޕުގެ 11 އެއަރލައިނާއި މެދުއިރުމަތީގެ ހަތް އެއަރލައިނާއި އިންޑިއާގެ ހަތަރު އެއަރލައިން އަދި އެހެނިހެން މަންޒިލްތަކުން ދަތުރުކުރާ އަށް އެއަރލައިނެވެ.

ރާއްޖޭގެ ފަތުރުވެރިކަން ރަނގަޅުވެ، ޖެހިޖެހިގެން ތިންވަނަ ފަހަރަށް ރާއްޖޭން ވަނީ ދުނިޔޭގެ އެންމެ މަގުބޫލު މަންޒިލުގެ ލަގަބު ވެސް ހޯދައިފައެވެ. އެންމެ ފުރަތަމަ މި ލަގަބު ރައްޖެއަށް ލިބުނީ 2020 ވަނަ އަހަރުއެވެ.