މިނިސްޓްރީ އޮފް އެޑިޔުކޭޝަނާއި އެމްއެންޑީއެފުން ގުޅިގެން މާލެއާއި ހުޅުމާލޭ ސްކޫލުތަކުގައި ގާއިމްކޮށްފައިވާ އަލިފާން ނިއްވާ ނިޒާމްތައް ޗެކުކުރުމުގެ ޕްރޮގްރާމެއް ފަށައިފިއެވެ.
ނޮވެންބަރު 17 ވަނަ ދުވަހު ފެށި މި ޕްރޮގްރާމުގައި ބުރާސްފަތި ދުވަހުގެ ރޭ ޗެކްކޮށްފައިވަނީ އިސްކަންދަރު ސްކޫލުގައި ޤާއިމްކޮށްފައިވާ އަލިފާން ނިއްވާ ނިޒާމްތަކެވެ.
ދެ ހަފުތާގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމުގައި މާލެއާއި ހުޅުމާލޭގެ 22 ސްކޫލަކަށް ގޮސް އެ ސްކޫލުތަކުގައި ޤާއިމްކޮށްފައި ހުރި އަލިފާން ނިއްވާ ނިޒާމްތައް ހުރީ ރަނގަޅު ހާލަތެއްގައިތޯ ބަލައި ޗެކްކުރާނެއެވެ.
މި ޕްރޮގްރާމުގައި ހަރަކާތްތެރިވަނީ އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރމަނުންނެވެ.
އެޑިއުކޭޝަން މިނިސްޓްރީއާއި އެމްއެންޑީއެފުން ގުޅިގެން މި ޕްރޮގްރާމް ފަށާފައިވާއިރު ދާދި ފަހުން ހުޅުމާލެ ރެހެންދި ސްކޫލުގައި ވަނީ އަލިފާނުގެ ހާދިސާއެއް ހިނގާފައެވެ.
